Berdevkê Tevgera Berxwedana Îslamî (HAMAS) Hazim Qasim êrîşa rejîma îşxalker a li ser başûrê Sûrîyeyê şermezar kir.

Qasim diyar kir ku êrîşa rejîma îşxalker a li ser Sûrîyeyê nîşaneya hewldanên wê yên ji bo berfirehkirina êrîşên xwe li herêmê ye û bang li welatên Ereb kir ku li dijî vê yekê helwest bigirin.

Qasim li hember êrîşa ku ji teref rejîma îşxalker ve li ser gundê Beyt Cinn ê herêma Qetana ya gundewarê Şamê li başûrê Sûrîyeyê pêk hat, bertek nîşan da.

Qasim got, "Êrîşa îsraîlê ya îro sibê li ser Sûrîyeyê û bombebarana wê ya berdewam a li ser Xezzeyê, Şerîaya Rojava û Lubnanê nîşana hewldanên wê yên ji bo berfirehkirina êrîşên xwe li seranserê herêmê ye."

Qasim diyar kir ku "helwesta êrîşkar a hikûmeta îşxalker sedema rastîn a bêîstîqrariya li herêmê ye" û tekez kir ku divê welatên Ereb helwestek hevbeş bigirin da ku dawî li bêwijdaniya van îşxalkeran  bînin.

Di êrîşa rejîma îşxalker a li ser gundê Beyt Cinn ê herêma Qetana ya gundewarê parêzgeha Şamê ya li başûrê Sûrîyeyê de sêzdeh kes, di nav wan de du zarok û du jin, canê xwe ji dest dan. Di pevçûna piştî êrîşê de şeş leşkerên îşxalker birîndar bûn, ku sê ji wan bi giranî birîndar bûn. (ÎLKHA)