Serokkomarê Kolombiyayê Gustavo Petro êrîşên hewayî yên rêveberiya Serokê Emrîkayê Donald Trump li Karayîban wekî "kuştinên bêdad" bi nav kir, hevkariya îstîxbaratê rawestand û daxwaza lêpirsîna sûcên şer li ser Trump kir.

Serokê Kolombiyayê Gustavo Petro rawestandina parvekirina îstîxbaratê di navbera hêzên ewlehiyê yên welatê xwe û ajansên Emrîkayî de ragihand. Petro êrîşên asmanî yên kujer ên Emrîkayî li Behra Karayîbê, ku tê îddîakirin ku armanca wan têkoşîna li dijî bazirganiya narkotîkê ye, wekî sedema vê biryarê nîşan da.

Petro li ser platforma X ragihand ku wî ferman daye artêşa Kolombiyayê ku "hemû têkilî û rêkeftinên bi ajansên ewlehiyê yên Amerîkî re tavilê rawestîne." Petro êrîşên Washingtonê yên li ser qeyikên bilez ên ku tê îddîakirin ku maddeyên hişber hildigirin wekî "kuştinên bêdad" bi nav kir û got, "Têkoşîna li dijî maddeyên hişber divê bi rêzgirtina mafên mirovan ên gelên Karayîbê were meşandin."

Rêveberiya Trump van operasyonan wekî "parastina rewa li dijî torên navneteweyî yên narkotîkê" bi nav dike. Lêbelê, li gorî serokê Kolombiyayê, van êrîşan welatiyên Venezuela, Ekvador, Kolombiya û Trinidad-Tobago jî hedef girtin.

Li gorî daneyên Emrîkayê bi xwe, ji Tebaxê ve di operasyonên li herêmên Karayîb û rojhilatê Pasîfîkê de herî kêm 75 kes mirine.

Petro her wiha daxwaza lêpirsîneke navneteweyî li ser Serokê Emrîkayê Donald Trump ji ber "kirina tawanên şer" kir.

Ev gav bûye sedema pêlek nû ya aloziyê di têkiliyên di navbera Bogota û Washingtonê de, ku bi salan e di têkoşîna li dijî bazirganiya madeyên hişber de hevkariyê dikin. (ÎLKHA)