ڕۆژی ١٦ی مانگی رابردوو سوپای توركیا ئۆپەراسیۆنێكی سەربازیی دژی چەكدارانی پەكەكە لە نێو سنووری ھەرێمی كوردستان ئەنجام دا.

ئەندامێكی لیژنەی بەدواداچوونی كێشەكانی سنووریش دەڵێ، بە ھۆی ئۆپڕاسیۆنەکانی تورکیا و شەڕ لەگەڵ پەکەکە، دەیان گوند چۆڵ كراون و نزیكەی ٢٠٠ ھاووڵاتیش بوونەتە قوربانی.

ژیان تاھیر ئەندامی لیژنەی بەدواداچوونی كێشەكانی سەر سنوور لە پەرلەمانی كوردستان سەبارەت بەم بابەتە لە ماڵپەڕی فەرمی پارتی دیموکراتی کوردستان راگەیەندراوێکی بڵاو کردەوە.

ژیان تاھیر ئەندامی لیژنەی بەدواداچوونی كێشەكانی سەر سنوور لە پەرلەمانی كوردستان وتی، "لەلایەن پەرلەمانەوە لیژنەی بەدواداچوون سەردانی سنووری پارێزگای دھۆكی كرد و بەپێی بەدواداچوونی ئێمە لە سنووری ناحیەی باتۆفە بە ھۆی كێشەی سنووری و شەڕی پەكەكە و توركیاوە، ٢٧ گوند ئاوەدان نەكراونەتەوە و لە رۆژانی رابردووشدا سێ گوندی دیكەی ناحیەكە بە ھۆی تۆپبارانی توركیاوە چۆڵ كراون، ھەروەھا لە سنووری ناحیەی دەركاریش ٢٦ گوند كەوتوونەتە بەر تۆپبارانی توركیا و لە شنگالیش شەش پێگە كراونەتە ئامانج."

ناوبراو لە بەردەوامی وتی، "لە سنووری قەزای ئامێدییش بە ھۆی ھەبوونی بنكە و بارەگای چەكدارانی پەكەكە، ١٩٨ گوند چۆڵ كراون و خەڵكەكەی لە سەنتەری شارەكان و كۆمەڵگاكان نیشتەجێیە، بەداخەوە بە ھۆی ھەبوونی بنكە و بارەگای پەكەكە، بەردەوام سنووری ھەرسێ قەزای ئاكرێ و ئامێدی و زاخۆ لەلایەن وڵاتی توركیاوە بوردوومان دەكرێن."

تاھیر وتی، "لە ئەنجامی كێشەكانی سەر سنوور و شەڕوپێكدادانی نێوان توركیا و پەكەكە، ساڵانی رابردوو لە قەزای زاخۆ تا ئێستا ٣٢ ھاووڵاتی شەھید بوونە و ١٠ كەسیش بریندار بوون، لە ئامێدی ٢٨ شەھید و چوار بریندار ھەن، لە سنووری قەزای ئاكرێ زیاتر لە ١٠٠ ھاووڵاتی شەھید بوونە."

هەروەها وتی، "بە ھۆی ئاڵۆزیی رەوشی سنوور و شەڕی پەكەكە و توركیا، رێژەی بێكاری لە سنووری پارێزگای دھۆك لە ھەڵكشاندایە، چونكە ئەو ناوچانەی شەڕیان تێدایە، لە ڕووی كشتوكاڵییەوە ناوچەی ستراتیژین و خەڵكەكەی ناتوانن سوودمەند بن و زۆربەیان لە ئامێدی و زاخۆ و ئاكرێ بێكارن."(İLKHA)