بەمەبەستی کەمکردنەوەی جەنجاڵییەکانی هاتوچۆ و ئاسانکاری بۆ شۆفێران، پڕۆژەیەکی دیکەی دروستکردنی شەقامی ٦٠ مەتری لە هەولێر جێبەجێ دەکرێت.

بە پێی ڕاگەیەندراوێکی فەرمانگەی میدیا و زانیاری حکومەتی هەرێمی کوردستان، لە هەنگاوێکی گرنگدا، بەمەبەستی کەمکردنەوەی جەنجاڵییەکانی هاتوچۆ و ئاسانکاری بۆ شۆفێران، پڕۆژەیەکی دیکەی دروستکردنی شەقامی ٦٠ مەتری لە هەولێر جێبەجێ دەکرێت، کە دەبێتە خاڵی بەیەکگەیشتن و بەستەرێکی گرنگ لەنێوان هەردوو شەقامی ١٢٠ مەتری و ١٥٠ مەتری.

دەستنیشان کرا، "ئەم شەقامە نوێیە، بە تێچووی ٣٦ ملیار و ٣٠٠ ملیۆن دینار جێبەجێ دەکرێت."

باس لەوە کرا کە لە چوارچێوەی قۆناغی کارکردندا، ١٠ کیلۆمەتر شەقامی نوێ لە کۆی گشتیی ١٥ کیلۆمەتری شەقامەکە دروست دەکرێت، کە ڕووبەری گشتیی کارکردن تێیدا دەگاتە ١٨٢ هەزار مەتر دووجا.

جێبەجێکردنی ئەم پڕۆژەیە وەک یەکێک لە پڕۆژە گرنگەکانی ژێرخانی ڕێگاوبان سەیر دەکرێت، کە چاوەڕوان دەکرێت دوای تەواوبوونی، کاریگەرییەکی ڕاستەوخۆ و بەرچاوی هەبێت لەسەر خێراترکردنی جووڵەی شۆفێران و نەهێشتنی قەرەباڵغی لەنێوان شەقامە سەرەکییەکاندا.(İLKHA)