چەندین ناوچە لە کەناری ڕۆژئاوا بەرەبەیانی پێنجشەممە گۆڕەپانی هێرشە بەربڵاوەکانی سەربازانی سەهیۆنی و پەلاماردانی ماڵە فەلەستینییەکان، دەستبەسەرکردنی فەلەستینییەکان و جێگیرکردنی ئۆتۆمبێلە سەربازییەکان بوون، کە هاوکات بوو لەگەڵ هێرشی شارۆچکەنشینە سەهیۆنییەکان، داخستنی ڕێگاکان و پچڕانی کارەبای دانیشتووانی چەندین ناوچە.

بە پێی هەواڵێکی ناوەندی ڕاگەیاندی فەلەستین، لە شاری قەلقیلیە، داگیرکەرانی سەهیۆنی لە میانی جێگیرکردنی هێزە سەربازییە پشتیوانەکان بە هاوەڵیی بوڵدۆزەرێک پەلاماری ئەم شارەیان دا و هاوکات لەگەڵ ڕوودانی تێکهەڵچوونەکان، دوو فەلەستینی بەهۆی بەرکەوتنی گولڵەی داگیرکەرانی سەهیۆنییەوە بریندار بوون.

هەروەها داگیرکەرانی سەهیۆنی لە میانی پەلامارە بەربڵاوەکاندا، دوو گەنجیان بە ناوەکانی فادی یووسف داوود و خالید مەحموود نەزال لە ناوچەی ئەلتەبەل دەستبەسەر کرد، ئەمە لە کاتێکدایە کە دەستدرێژیکارانی سەهیۆنی پەلاماری چەندین ماڵیان دا و یەکێک لە زەوییەکانیان بە بوڵدۆزەر وێران کرد.

هەروەها سەربازانی داگیرکەر پەلاماری شارۆچکەکانی حەبلە و عەزوونیان لە باشوور و ڕۆژهەڵاتی قەلقیلیە دا و هێرشیان کردە سەر باڵەخانەیەکی نیشتەجێبوون لە حەبلە، لە کاتێکدا عەزوون شایەتحاڵی پەلامارەکان و دەستبەسەرکردنی بەربڵاوی فەلەستینییەکان بوو.

لە پارێزگای تووباس، هێزەکانی سوپای رژێمی داگیرکەر هێرشیان کردە سەر شاری تووباس و پەلاماری یەکێک لە ماڵەکانیان دا. ئەوان هەروەها هێرشیان کردە سەر شارۆچکەی تەمون لە باشووری ئەم پارێزگایە و هێزە سەربازییە پشتیوانەکانیان بە هاوەڵیی بوڵدۆزەرێک جێگیر کرد و لە گەڕەکەکانی ئەم شارەدا جێگیر بوون و دەستیان بە دەستبەسەرکردنی بەربڵاوی فەلەستینییەکان کرد.

هەروەها سەربازانی سەهیۆنی بە هێرشکردنە سەر گوندی تیاسیر لە ڕۆژهەڵاتی تووباس، پەلاماری یەکێک لە ماڵەکانیان دا.

لە پارێزگای نابلوس، داگیرکەرانی سەهیۆنی پەلاماری گوندی بەیت ئیمرین لە باکووری ڕۆژئاوای ئەم پارێزگایە و شارۆچکەی سەباستیا-یان دا و هەروەها لە لای بازگەی بەیت فووریکەوە پەلاماری شاری نابلوس-یان دا.

لە بەشی ڕۆژهەڵاتی پارێزگای نابلوس، پێگەیەکی نوێی شارۆچکەنشینی لە ناوچەی ئەلدەهر هەڵکەوتوو لە ڕۆژهەڵاتی بەیت فووریک دەرکەوت، ئەمە لە کاتێکدایە کە شارۆچکەنشینە سەهیۆنییەکان ڕێگای بەرەو ناوچەی ئەلمەسعوودیە-یان لە باکووری ڕۆژئاوای نابلوس داخست و کارەبای دانیشتووانی ئەم ناوچەیەیان پچڕاند.

لە پارێزگای جەنین-یش هێزەکانی سوپای رژێمی داگیرکەر پەلاماری شارۆچکەی ئەلسیلە ئەلحارسییە-یان لە ڕۆژئاوای ئەم پارێزگایە دا و هەروەها لە میانی پەلاماردانی گوندی کەفر قوود لە باکووری ڕۆژئاوای جەنین، هێرشیان کردە سەر ماڵێک.

لە پارێزگای ئەلخەلیل-یش هێزەکانی سوپای ڕژێمی داگیرکەری سەهیۆنی پەلاماری شارۆچکەی ئەلزاهرییە-یان لە باشووری ئەم پارێزگایە دا، ئەمە لە کاتێکدایە کە شارۆچکەنشینە سەهیۆنییەکان ڕێگای بەرەو گوندی ئوم ئەلخەیر لە مەسافیر یەتا، لە باشووری ئەلخەلیل داخست.

هەروەها داگیرکەرانی سەهیۆنی پەلاماری گوندی ئەلموغەییر-یان لە باکووری ڕۆژهەڵاتی ڕامەڵڵا دا و هێرشیان کردە سەر یەکێک لە ماڵەکان، ئەوان هەروەها پەلاماری شارۆچکەی بەیت فەجار-یان لە باشووری بەیت لەحم دا.(İLKHA)