Tevgera Ensarullah a Yemenê ragihand ku wan bi mûşekên balîstîk û dronan balafirgeha Abha ya li başûrê Erebistana Siûdî hedef girtiye.

Berdevkê leşkerî yê Ensarullahê Yahya Serî, Erebistana Siûdî bi êrîşên li ser Balafirgeha Sana'ayê sûcdar kir û îddîa kir ku wan bi êrîşkirina Balafirgeha Abhayê bersiv dane. Serî diyar kir ku tehdîdên li ser qada hewayî ya Siûdî ew ê heta ku dorpêça li ser Sana'ayê were rakirin berdewam bikin û bang li xetên hewayî yên navneteweyî kir ku ji karanîna wê dûr bisekinin. Wî her wiha ji bo piştgiriya Îranê spasiya xwe kir.

Berdevkê koalîsyonê Turkî El - Malikî ragihand ku pergalên parastina hewayî li dijî mûşekên balîstîk ên ku ber bi başûrê Erebistana Siûdî ve hatine avêtin bi serkeftî hatine aktîfkirin. Wezareta Veguhestinê ya Yemenê ragihand ku operasyonên li hemî balafirgehên welat wekî normal berdewam dikin.

Li gorî agahiyan, alozî ji ber ku balafireke Îranê hewl da ku li Balafirgeha Sana'ayê, ku di bin kontrola Ensarullah de ye, dakeve qada hewayî ya Yemenê dest pê kir. Tê gotin ku hikûmeta Yemenê ji bo pêşîgirtina li daketinê balafirgehê hedef girtiye û paşê balafir ber bi Balafirgeha Hudeydayê ve hatiye veguhastin. (ÎLKHA)