فەرماندە فەوزی ئەلمەنسووری بەرپرسی هەواڵگری سەربازی ڕژێمی خەلیفە حەفتەر لە ڕۆژهەڵاتی لیبیا لە بنغازی بەهۆی تەقینەوەی بۆمبێکی چێنراو لەناو ئۆتۆمبێلەکەیدا گیانی لەدەستدا.

مەیجر جەنەڕاڵ فەوزی ئەلمەنسووری، سەرۆکی دەزگای هەواڵگری سەربازی خەلیفە حەفتەر لە ڕۆژهەڵاتی لیبیا، لە هێرشێکی بۆمبڕێژکراودا لە شاری بنغازی کوژرا.

دەسەڵاتدارانی ڕۆژهەڵاتی لیبیا ڕایانگەیاند، ئەو تەقینەوەیەی ئێوارەی ڕۆژی دووشەممە لە ناحیەی ئەلهاواری لە بنغازی ڕوویدا، ئەو ئۆتۆمبێلەی مەنسووری تێیدا بوو کراوە ئامانج، هەروەها سەرچاوە میدیاییە ناوخۆییەکانی ناوچەکەش وێنەی ئۆتۆمبێلە سووتاوەکەیان بڵاوکردەوە و ڕایانگەیاند کە هێرشەکە مەنسووری کردۆتە ئامانج.

تا ئێستا هیچ گروپێک بەرپرسیارێتی هێرشەکەی لە ئەستۆ نەگرتووە و دەسەڵاتدارانی ڕۆژهەڵاتی لیبیا لێکۆڵینەوەیان دەستپێکردووە بۆ ئاشکراکردنی ڕووداوەکە و دەستگیرکردنی ئەنجامدەرانی ئەو هێرشە.(İLKHA)