سەربازە سەهیۆنییەکان بەرەبەیانی ئەمڕۆ دووشەممە هێرشیان کردە سەر ناوچە جیاجیاکانی کەناری ڕۆژئاوا.

بە پێی هەواڵێکی ناوەندی ڕاگەیاندنی فەلەستین، داگیرکەرانی سەهیۆنی لە ڕەوتی ئەم هێرشانەدا ٩ فەلەستینییان، لەوانە پارێزەرێکی مافی مرۆڤ و ژمارەیەک لە دیلە ئازادکراوەکان، دەستبەسەر کرد.

سوپای رژێمی داگیرکەر بە هێرشکردنە سەر شارۆچکەی کەفر قەلیل لە باشووری نابلوس، پەلاماری ژمارەیەک ماڵی فەلەستینییەکانیان دا و پشکنینیان کردن و بەراء نەواف عامر لە پارێزەرانی مافی مرۆڤ و هاووڵاتییەکی دیکەیان دەستبەسەر کرد.

سەربازە سەهیۆنییەکان هەروەها بە هێرشکردنە سەر گەڕەکی زاهیە لە ناوچەی ڕۆژهەڵاتی نابلوس، ٢ فەلەستینییان بە دیل گرت.

ئەنجومەنی یاسایی یانەی دیلی فەلەستین ڕایگەیاند کە داگیرکەرانی سەهیۆنی ٣ هاووڵاتیی فەلەستینییان لە شارۆچکەی تەممون کە دەکەوێتە باشووری تووباس، دەستبەسەر کرد.

ئەمە لە کاتێکدایە کە سوپای سەهیۆنی بەرەبەیانی ئەمڕۆ جارێکی دیکە ئوسامە نەخلەی ئازادکراو و بەرپرسی هەماهەنگیی ئەنجومەنی خوێندکارانی زانکۆی بێرزەیتی، پاش پەلاماردانی ماڵەکەی لە گەڕەکی تیرە لە ڕامەڵڵا، دەستبەسەر کرد.

سەربازە سەهیۆنییەکان هەروەها بە هێرشکردنە سەر باشووری شاری ئەلخەلیل، ١ فەلەستینییان لە ناوچەی واد ئەلجەوایە دەستبەسەر کرد.

سەربازە سەهیۆنییەکان بەیانیی ئەمڕۆ بە هێرشکردنە سەر گوندی کەفر قەدووم لە ڕۆژهەڵاتی قەلقلییە، پەلاماری چەندین ماڵی فەلەستینییەکانیان دا و پشکنینیان کردن.

ئەوان هەروەها هێرشیان کردە سەر گوندی عەزمووت لە ڕۆژهەڵاتی نابلوس، گەڕەکی ڕۆژهەڵاتی شاری جەنین، شارۆچکەی جەبەع لە باشووری جەنین و گوندی ڕوومانە لە ڕۆژئاوای جەنین.(İLKHA)