Di berdewamîya bombardimankirina deverên curbicur ên Xezzeyê de, di roja 458emîn a şerê qirkirinê de, îro herî kêm 14 kes şehîd bûn û bi dehan kes jî birîndar bûn.

Çavkaniyên herêmî ragihandin ku balafirên şer ên îşxalê li derdora Bîrkat Şêx Ridvan a bakurê bajarê Xezzeyê maleke malbata Berekat bombebaran kirin û di encamê de 4 kes şehîd bûn û bi heman awayî jî birîndar bûn.

Di encama bombebarana balafirên bêmirov ên îşxalker a li avahiya El Zibak a li kêleka Mizgefta Mezin a Omerî ya li Bajarê Kevin a li navenda Xezzeyê de, zarokek û jinek şehîd bûn, di nav de zarok, jin û extiyar gelek kes birîndar bûn.

Di bomberdûmana îşxalkeran a li ser kampa Cebeliya ya li bakurê Xezzeyê de kesek, di bombebarana ku li bakur didome de 2 cêwîk şehîd bûn.

Xwebexşê Nexweşxaneya Şehîd Eqsayê ya li Dêra Belahê Dr. Sebat Salim di encama bomberdûmana ku ji aliyê îşxalkeran ve li ser maleke kampa Nuseyrat a li navenda Xezzeyê hat kirin de şehîd bû.

Li herêma Musbeh a li bakurê bajarê Refahê ya li başûrê Xezzeyê di encama gulebarana îşxalkeran de 2 kes şehîd bûn.

Di encama bomberdûmana li bakurê rojhilatê Refahê de 2 kesên din jî şehîd bûn.

Ji 7ê Cotmeha 2023an vir va êrîşên îşxalkeran ên li ser Xezzeyê ji aliyê bejahî, deryayî û hewayî va dewam dikin û heta îro zêdeyî 45 hezar û 805 kes ku piraniya wan jin û zarok in şehîd bûne û zêdetirî 109 hezar û 64 kes jî birîndar bûne. Ji ber dijwariya bombebaranê û berdewamiya êrîşan, tîmên ambulans û rizgarkirinê nikarin xwe bigihînin kesên ku di bin xirbeyan de û bi hezaran kesên winda ne. (ÎLKHA)