Rejîma sîyonîst li Xezzeyê agirbestê îxlal kir. Di êrîşên hewayî û topxaneyî de sê Filistînî şehîd bûn û gelekên din jî birîndar bûn. Ji 10ê Cotmeha 2025an vir ve, jimara şehîdan li Xezzeyê gihîştiye 1109 kesan.

Li gorî çavkaniyên tenduristiyê, Usame Naîm Şemla di êrîşeke asmanî de ku li taxa Tel el-Hawa, li başûrê rojavayê bajarê Xezzeyê, li hember stadyuma el-Wehde, motorsîkletek hedef girtibû, şehîd bû.

Li Kolana Selahedîn a navenda Xezzeyê, di encama gulebarana hêzên îsraîlê de Filistîniyek bi giranî birîndar bû. Her wiha di êrîşeke li ser sivîlan li herêma Tewam a bakurê rojavayê Xezzeyê de gelek kes birîndar bûn.

Çavkaniyên herêmî ragihandin ku Tariq Hemîd Keşta ku çend roj berê li herêma Mawasî ya Xan Yûnisê ji aliyê hêzên îşxalker ve bi gulebaranê birîndar bûbû, miriye.

Di heman demê de, hate ragihandin ku di êrîşa bêmirov a li ser malekê li Kampa Penaberan a Megazî ya li navenda Xezzeyê de Filistîniyekî din jî hatiye kuştin.

Topxaneya hêzên îşxalker ên sîyonîst rojhilatê Deyr Belehê hedef girt, di heman demê de dronên çarkopter guleyên giran li ser malên nêzîkî Kolana Selahedîn a li rojhilatê bajarê Xezzeyê reşandin. Deverên rojhilatê bajêr jî ji ber topan hatin bombebarankirin.

Hate diyarkirin ku îşxalker bi êrîşên hewayî û topxane, bombebarankirina deverên ku Filistîniyên koçber lê penaber bûne, çalakiyên hilweşandinê li herêma ku wekî "xeta zer" tê zanîn, û domandina sînordarkirinên li ser alîkariya mirovî, kelûpelên bazirganî û seferê, peymana agirbestê îxlal dikin. (ÎLKHA)