Wezareta Parastinê ya Rûsyayê, di nûvekirina xwe ya rojane ya li ser şerê li Ukraynayê de ragihand ku wargeha Volokhovskoye ya li herêma Xarkîvê ketiye bin kontrola hêzên Rûsyayê.

Di daxuyaniya wezaretê de hat gotin ku di şevê de, bi çekên hewayî yên rastbûna bilind êrîşî tesîsên dakêşandin û depokirinê yên li bendera Odesayê hatine kirin, ku ji hêla artêşa Ukraynayê ve ji bo operasyonên lojîstîkî têne bikar anîn. Di daxuyaniyê de hat gotin ku tesîsên hedefgirtî ji bo barkirina cebilxane û alavên leşkerî têne bikar anîn.

Hat ragihandin ku hêmanên hewayî yên operasyonel-taktîkî yên Rûsyayê, balafirên bêmirov, yekîneyên mûşekî û yekîneyên topxaneyê li Ukraynayê êrîşî 144 deverên cuda kirin, di nav de deverên hilberîn û depokirina UAV-ên dûravêj, binesaziya enerjî û veguhastinê, û cihên ku tê îddîakirin ku ji hêla leşker û şervanên biyanî yên Ukraynayê ve hatine îşxalkirin.

Wezaretê ragihand ku di encama operasyonên berdewam de, wargeha Volohovskoye ya li herêma Xarkîvê hatiye kontrolkirin.

Di daxuyaniyê de her wiha hat îddîakirin ku di 24 saetên dawî de, artêşa Ukraynayê di pevçûnan de 1490 leşker, her wiha 17 wesayîtên şer ên zirxî, di nav de tank, pergala mûşekên parastina hewayî û roketavêjek piralî ya "Grad" jî hene, winda kiriye.

Li gorî raporê, pergalên parastina hewayî yên Rûsyayê di 24 saetên dawî de 11 mûşekên rêberkirî, 8 mûşekên HIMARS ên çêkirî yên Amerîkî, 7 mûşekên krûz ên dûr-menzîl ên Flamingo û 655 balafirên bêmirov ên baskên sabît têk birine. (ÎLKHA)