Li kampên ji bo kesên bêwar ên li herêma Darfûr a Sûdanê, wêranîya ji ber pevçûnê niha bi şewba kolerayê re jî girantir bûye. Ji ber ku lênêrîna tenduristiyê bi giranî qut bûye û gihîştina ava paqij û xwarinê bi tundî sînordar e, destpêkirina demsala baranê dibe sedema belavbûna bilez a nexweşiyên vegirtî.

Li gorî brifîngeke Rêxistina Tenduristiyê ya Cîhanê (WHO) li Cenevreyê, li Sûdanê zêdetirî 1330 bûyerên kolerayê û 114 mirin hatine qeydkirin. Rayedar endîşedar in ku ji ber demsala baranê hejmara bûyeran hêj zêde bibe.

Nûnerê WHO li Sûdanê Dr. Şîbl Sahbanî, diyar kir ku rêjeya mirinê ji ber kolerayê gihîştiye ji sedî 13.7, û ew wekî "pir zêde" bi nav kir. Wî destnîşan kir ku şewb bi taybetî li herêmên Darfur û Kordofanê zêde bûye, û da zanîn ku ekîbên alîkarîya mirovî û yên tenduristî ji ber pevçûnên berdewam di gihîştina van deveran de rastî zehmetiyên mezin tên.

Sahbanî girîngiya gihandina kelûpelên tenduristî û xwarinê bo bajarên dorpêçkirî yên wekî El-Ubeyd, Qaduxlî û Delling tekez kir, di heman demê de destnîşan kir ku pevçûnên berdewam bi giranî astengiya şerê li dijî pandemiyê çêdikin.

Dibe ku wêneyê rastîn ji hejmarên fermî jî mezintir be.

Çavkanîyên li herêmê dibêjin ku daneyên hatine belavkirin bi tevahî rêjeya rastîn a pandemiyê nîşan nadin. (ÎLKHA)