ڕیکاردۆ پیرس، وتەبێژی سندووقی منداڵانی نەتەوە یەکگرتووەکان (یونیسێف)، ڕایگەیاند کە لە کاتی دەستپێکردنی ڕێککەوتنی ئاگربەست لە ١١ی تشرینی یەکەمی ڕابردووەوە لە کەرتی غەززە، "بە تێکڕا ڕۆژانە دوو منداڵ بەهۆی هێرشەکانی ئیسرائیل لەم ناوچەیە گیانیان لەدەست دەدەن."

ناوبراو کە لە کۆنگرەی ڕۆژنامەوانیی هەفتانەی خۆیدا لە نووسینگەی نەتەوە یەکگرتووەکان لە ژنێڤ قسەی دەکرد، وتی، "سەرەڕای بوونی ئاگربەست، ڕۆژی ڕابردوو (پێنجشەممە) کچێکی منداڵ لە هێرشی ئاسمانیی ئیسرائیل بۆ سەر خان یونس لە باشووری کەرتی غەززە کوژرا و ڕۆژێک پێش ئەوەش، حەوت منداڵ لە شاری غەززە گیانیان لەدەست دا."

پیرس لە درێژەدا وتی، "لە سەرەتای دەستپێکردنی ئاگربەست لە ١١ی تشرینی یەکەمەوە، لانی کەم ٦٧ منداڵ لە هێرشەکانی ئیسرائیل لە کەرتی غەززە شەهید بوون و دەیان منداڵی دیکەش بریندار بوون. ئەم ئامارە دەریدەخات کە ڕێژەی گیانلەدەستدانی منداڵان لە کاتی ئاگربەستەوە، ڕۆژانە دوو کەس بووە."

ئەو بە جەختکردنەوە لەسەر ڕەهەندە مرۆییەکانی کارەساتەکە، ڕوونی کردەوە، "ئەم ژمارانە تەنیا ئامار نین، بەڵکو هەر یەکەیان نوێنەرایەتیی منداڵێک دەکات کە خێزان و خەونی هەبووە." پیرس هۆشداریی دا، "واقیعێکی زۆر سەخت بەسەر منداڵانی غەززەدا سەپێنراوە؛ هیچ شوێنێکی ئارام بۆیان بوونی نییە و جیهان ناتوانێت بەردەوام بێت لە ئاساییکردنەوەی ئەم ئازار و مەینەتییە."

وتەبێژی یونیسێف ئاماژەی بەوە دا کە ئەم ڕێکخراوە دەستێوەردانی بەرفراوان لە غەززە ئەنجام دەدات، بەڵام دانی بەوەدا نا کە ئەم هەوڵانە هێشتا بەس نین. ئەو وتی، "ئەگەر یارمەتی و پشتیوانییە پێویستەکان، بەڕاستی خێراتر بە دەستمان بگەیەشتایە، بە دڵنیاییەوە دەمانتوانی کاری زیاتر ئەنجام بدەین."

پیرس دۆخی کارەساتباری ئێستای خستە ڕوو و وتی، "سەدان هەزار منداڵ لەناو خێوەتەکاندا دەژین و بەرەنگاری دۆخی زۆر سەختی زستان دەبنەوە. منداڵانی غەززە شەوان بەبێ هیچ ئامێرێکی گەرمکەرەوە، دابڕی گونجاو یان تەنانەت بەتانی بەسەر دەبەن کە دەبێتە هۆی ئازارچەشتنی توندیان بەهۆی سەرماوە."(İLKHA)