نووسینگەی ڕاگەیاندنی حکوومی لە کەرتی غەززە شەوی سێشەممە بە بڵاوکردنەوەی بەیاننامەیەک ڕایگەیاند کە بە شەهیدبوونی مەحموود وادی، فۆتۆگرافەری ڕۆژنامەوانی کە لەگەڵ چەندین میدیای ناوخۆیی و دەرەکی کاری دەکرد، ژمارەی ڕۆژنامەنووسانی شەهید لە سەرەتای جەنگی کۆمەڵکوژی لە غەززە بۆ ٢٥٧ کەس بەرز بووەتەوە.

بەپێی ڕاپۆرتی ناوەندی ڕاگەیاندنی فەلەستین، ئەم نووسینگەیە لە بەیاننامە ڕۆژنامەوانییەکەیدا، بەئامانجگرتن، کوشتار و تیرۆری سیستەماتیکی ڕۆژنامەنووسانی فەڵەستینی لەلایەن داگیرکەرانی سەهیۆنییەوە بە توندترین شێوە سەرکۆنە کرد.

هەروەها ئەم دامەزراوەیە داوای لە فیدراسیۆنی نێودەوڵەتیی ڕۆژنامەنووسان، یەکێتیی ڕۆژنامەنووسانی عەرەب و سەرجەم ناوەندە ڕۆژنامەوانییەکان لە سەرتاسەری جیهان کرد تا ئەم تاوانە سیستەماتیکانە دژی ڕۆژنامەنووسان و چالاکوانانی میدیایی فەلەستینی لە کەرتی غەززە سەرکۆنە بکەن.

نووسینگەی ڕاگەیاندنی حکوومیی غەززە لە درێژەدا، داگیرکەرانی سەهیۆنی، حکومەتی ئەمریکا و وڵاتانی هاودەست لە تاوانی کۆمەڵکوژیدا لەوانە بەریتانیا، ئەڵمانیا و فەڕەنسای بە بەرپرسیاری تەواوی ئەنجامدانی ئەم تاوانە دڕندانە و دڵتەزێنانە زانی.

ئەم بەیاننامەیە داوای لە کۆمەڵگەی نێودەوڵەتی، ڕێکخراوە نێودەوڵەتییەکان و ڕێکخراوە پەیوەندیدارەکان بە کاری ڕۆژنامەوانی و میدیایی لە سەرتاسەری جیهان کرد کە تاوانەکانی داگیرکەران سەرکۆنە بکەن، ڕێگری لێ بکەن و بکەرانی لە دادگا نێودەوڵەتییەکاندا بەهۆی تاوانە بەردەوامەکانیانەوە ڕووبەڕووی لێپرسینەوە بکەنەوە و ڕادەستی دادپەروەرییان بکەن.

هەروەها داوا لەم ناوەندانە کرا کە فشارێکی جددی و کاریگەر بۆ ڕاگرتنی تاوانی کۆمەڵکوژی، پاراستنی ڕۆژنامەنووسان و چالاکوانانی میدیایی لە کەرتی غەززە و ڕاگرتنی کوشتار و تیرۆرکردنیان بخەنە گەڕ.(İLKHA)