لە عێراق ئاستی ئامادەیی هێزە ئەمنییەکان لە هەموو ناوچەکانی سەرتاسەری وڵاتدا زیاد کراوە.

تۆڕی میدیایی ئەمنی عێراق ڕایگەیاند، عەلی زەیدی، سەرۆکوەزیران و فەرماندەی گشتیی هێزە چەکدارەکان، هێزە ئەمنییەکان و سەربازییەکانی ڕاسپاردووە، کە ئامادەیی ئەمنی و ئامادەیی شەڕیان زیاد بکەن.

شانەی ڕاگەیاندنی ئەمنی لە بەیاننامەیەکی ڕۆژنامەوانیدا ڕایگەیاندووە، بەپێی ڕێنماییەکانی فەرماندەی گشتی، بڕیاردراوە ئاستی ئامادەیی یەکە ئەمنی و سەربازییەکان بەرزبکرێتەوە، هەروەها چالاکییەکانی مەشق و ڕاهێنان و ئۆپەراسیۆنی مەیدانی لەناو ئەو یەکانە چڕتر بکرێتەوە.

لە ڕاگەیەندراوەکەدا ئاماژە بەوەشکراوە، ئامانجی ئەم هەنگاوە پاراستنی ئاستێکی بەرزی ئامادەیی بۆ هەموو دەزگا ئەمنییەکان و بەهێزکردنی تواناکانیان بۆ ئەنجامدانی ئەرکەکانیان بە شێوەیەکی کاریگەر و بەهێزکردنی ئاسایش و سەقامگیری لە سەرتاسەری وڵات، هاوکات بەشداریکردن لە پاراستنی هاوڵاتیان و بەرژەوەندی گشتی.

لە بەیاننامەیەکی دیکەی شانەی ڕاگەیاندنی ئەمنیدا ئاماژەی بەوە کراوە، بەپێی ڕێنماییەکانی سەرۆک وەزیران و فەرماندەی گشتی هێزە چەکدارەکان، عەلی زەیدی، کۆبوونەوەیەک بە سەرپەرشتی لیوا عەبدولئەمیر ئەلشەمەری، بەڕێوەبەری فەرماندەی گشتیی فەرماندەیی گشتیی هێزە چەکدارەکان بەڕێوەچوو. لە کۆبوونەوەکەدا سەرۆکی ئەرکانی سوپای وڵات و بەرپرسی ڕێکخراوی بەرەنگاربوونەوەی تیرۆر و بەرپرسانی ئەمنی و بەڕێوەبەرە گشتییەکان و نوێنەرانی هێزەکانی حەشدی شەعبی و ژمارەیەکی زۆر لە فەرماندەی پلە باڵا ئامادەبوون. سەرەڕای ئەوەش، سەرجەم فەرماندەکانی ئۆپەراسیۆنەکان و بەرپرسانی پۆلیسی پارێزگاکان لە ڕێگەی ڤیدیۆ کۆنفرانسی داخراوەوە بەشدارییان لە کۆبوونەوەکەدا کرد.

لە کۆبوونەوەکەدا باس لە جێبەجێکردنی ڕێنماییەکانی فەرماندەی گشتی و بەرزکردنەوەی ئاستی ئامادەیی هێزە ئەمنییەکان کرا، لە ناوچەی سنوورییەوە تا ئۆپەراسیۆنە مەیدانییەکان لە سەرجەم ناوچەکانی وڵات.

بەشداربووان جەختیان لەوە کردەوە کە عێراق ڕێگە نادرێت ببێتە خاڵی دەستپێکردنی هەڕەشە ناوخۆیی و دەرەکییەکان بۆ سەر هیچ وڵاتێک.

عەبدولئەمیر ئەلشەمەری، بەڕێوەبەری فەرمانگەی گشتی جەختی لە گرنگی کاری هەواڵگری کردەوە و ڕایگەیاند، پێویستە بە خێرایی زانیاریەکان هەڵسەنگێندرێن. هەروەها جەختی لە پێویستی یەکخستنی گوتاری میدیایی و بەرەنگاربوونەوەی زانیاری ناڕاست و پابەندبوون بە ڕێنماییەکان و پشتیوانیکردن لە هەموو هەنگاوەکانی بەهێزکردنی ئاسایش و سەقامگیری کردەوە.(İLKHA)