ڕووسیا داوای لە ژاپۆن کرد کە سیستەمی مووشەکی تایفون کە لە ئەمریکا دروستی کردووە بکشێنێتەوە.

ماریا زاخارۆڤا وتەبێژی وەزارەتی دەرەوەی ڕووسیا ڕایگەیاند کە ڕووسیا داوای کردووە ژاپۆن سیستەمی هەڵدانی مووشەکی وشکانی تایفون کە لە ئەمریکا دروستکراوە و بۆ هەڵدانی مووشەکی مامناوەند و کورت مەودا دیزاین کراوە بکشێنێتەوە.

زاخارۆڤا ڕایگەیاندووە، "لە ٣ی ئەیلولدا، یاداشتێکی ناڕەزایەتی بۆ لایەنی ژاپۆنی لە مۆسکۆ و تۆکیۆ نێردراوە سەبارەت بە جێگیرکردنی سیستەمی مووشەکی وشکانی تایفون کە لە ئەمریکا دروستکراوە، کە بۆ هەڵدانی مووشەکی مامناوەند و کورت مەودا داڕێژراوە، بۆ دوورگەی کیوشو".

زاخارۆڤا ئاماژەی بەوەدا کە تۆکیۆ جارێکی دیکە ئەم هەنگاوەی ناوە سەرەڕای دووبارەبوونەوەی دەستپێشخەرییە دیپلۆماسییەکانی لایەنی ڕووسی کە نیگەرانییەکانی دەربڕیوە سەبارەت بە هەڕەشەکان بۆ سەر ئاسایشی نیشتمانی و ئاشتی و سەقامگیری ناوچەکە، ئاماژەی بەوەشکرد، "جەختکرایەوە کە جێگیرکردنی پێشوەختەی ئەم سیستێمانە لەلایەن ژاپۆنەوە لەسەر خاکەکەی، لەژێر هەر بیانوویەکدا، بەبێ گوێدانە کات و شێوازی جێگیرکردن، قبوڵکراو نییە".

زاخارۆڤا ئاماژەی بەوەشکردووە، "داوا لە لایەنی ژاپۆنی کراوە کۆتایی بەم کارە بهێنێت و ئەو سیستەمەی کە باسی لێوە دەکرێت لە خاکەکەی بکشێنێتەوە".

زاخارۆڤا ڕایگەیاندووە، "ئەندرێ ڕودێنکۆ، جێگری وەزیری دەرەوەی ڕووسیا، لە کۆبوونەوەیەکدا لەگەڵ ئاکیرا موتۆ، باڵیۆزی ژاپۆن لە مۆسکۆ لە ١٦ی ئەیلوول، داوای لە تۆکیۆ کرد ناوەڕۆکی ئەو یاداشتەی پێشتر نێردراوە زۆر بە جددی وەربگرێت."(İLKHA)