وتەبێژی وەزارەتی دەرەوەی ئێران ئیسماعیل بەقایی، ڕایگەیاند کە گواستنەوەی یورانیۆمی پیتێنراو بۆ دەرەوەی وڵات بە هیچ شێوەیەک لە ڕۆژەڤدا نییە.

بەقایی لە چاوپێکەوتنێکدا لەگەڵ کەناڵی تەلەڤیزیۆنیی "المیادین"ی لە لوبنان، هەڵسەنگاندنی بۆ پەیوەندییە دیپلۆماسییەکانی نێوان ئێران و ئەمریکا و پرۆسەی دانوستانە ئەتۆمییەکان کرد. ناوبراو ئاماژەی بەوە دا کە بۆ نیشدانی جیدییەتی ئێران لە دانوستانەکاندا، ماوەی جێبەجێکردنی ئەو پلانی کارەی کە پێشتر پێشکەشی کردبوو، لە حەوت ڕۆژەوە بۆ دوو ڕۆژ کەم کردووەتەوە.

بەقایی ڕەخنەی لە ئیدارەی ئەمریکا گرت بەوەی کە بەردەوام ئامانجەکانی دانوستان دەگۆڕێت و پێی وا بوو کە هەندێک ناوەند لە واشنتۆن بەهۆی حساباتی سیاسی ناوخۆییەوە هەڵسوکەوت دەکەن. بەقایی ئەوەشی خستە ڕوو کە گفتوگۆ ڕاستەوخۆکان و پەیوەندییە تەلەفۆنییەکان بەردەوامن و بیری هێنایەوە کە پشکێنەرانی ئاژانسی نێودەوڵەتیی وزەی ئەتۆمی لەم نزیکانەدا پشکنینی خولییان لە وێستگەی ئەتۆمیی بوشەهر ئەنجام داوە.

بەقایی جەختی لەوە کرد کە کردنەوەی ئەو دامەزراوە ئەتۆمییە زیانلێکەوتووانە بۆ پشکنین لەم بارودۆخە ئەمنییەی ئێستادا لۆژیکی نییە و جەختی لەسەر هێڵە سوورەکانی ئێران سەبارەت بە بەرنامە ئەتۆمییەکەی کردەوە و وتی، "گواستنەوەی یورانیۆمی پیتێنراوی ئێران بۆ دەرەوەی وڵات لە بەرنامەماندا نییە."(İLKHA)