Hat ragihandin ku di encama hedefgirtina avahiyekî ji teref Emrîkayê ve li Sanaya paytexta Yemenê de 4 sivîl şehîd bûne û gelek sivîl jî birîndar bûne.

Televîzyona El-Mesîre ya girêdayî Tevgera Ensarullaha Yemenê ragihand: "Di êrîşa hewayî ya ku ji teref dijminên Emrîkayê ve li ser avahiyek li taxa Esr a paytext Sanayê hat kirin de, 4 sivîl hatin kuştin û gelek sivîl jî birîndar bûn."

Di raporê de hat ragihandin ku balafirên şer ên Emrîkayê her wiha êrîşî hinek deverên cuda yên bajarê Hudeyde yê Yemenê kirin.

Berîya niha jî di êrîşên hewayî yên Emrîka û Îngilîstanê yên li ser gelek bajaran ku Sanaya paytext jî di nav de ye, 79 kes şehîd bûbûn û 107 kes jî birîndar bibûn.

Tevgera Ensarullah di 7ê Adarê de bi daxuyaniyekê ragihandibû ku 4 roj mohlet dane rejîma îşxalker ku alîkarî derbasî Xezzeyê bibe, eger nebe ew ê operasyonên deryayî yên li dijî îsraîlê ji nû ve bidin destpêkirin.

Serokê Tevgera Ensarullah Ebdulmelik El-Hûsî diyar kir ku balafir û keştiyên şer ên Emrîkayê dê bibin hedefa Hûsiyan û heta êrîşên xwe bidomînin, astengkirina seyrûsefera behrê wê Washingtonê jî bigire nava xwe.  (ÎLKHA)