Tê gotin ku çend saet piştî tehdîdên nû yên Donald Trump a li dijî Îranê, Emrîkayê êrîşek li dijî Îranê da destpêkirinê.

Rayedarekî Amerîkî diyar kir ku hedefên leşkerî yên Îranê yên li dora Tengava Hurmuzê hatine lêdan, di heman demê de medyaya Îranê ragihand ku li bajarên Bender Ebas û Sirik dengê teqînan hatiye.

Rayedarekî ku ji Axios a li Emrîkayê re axivî got ku êrîşan radarên peravê, cihên avêtina mûşekên dijî-keştî û pergalên parastina hewayî yên girêdayî Pasdarên Şoreşa Îranê kirine hedef.

Ev êrîş piştî daxuyaniyên Serokê Emrîkayê Donald Trump ên derbarê Îranê de hat kirin. Trump îddîa kiribû ku Emrîkayê artêşa Îranê "wêran kiriye" û 59 keştî noq kiriye, û gotibû ku şerê li dijî Îranê ji aliyê leşkerî ve "serkeftî" ye.

Trump her wiha diyar kir ku ew ê nehêlin Îran çekên nukleerî bi dest bixe û got, "Em ê tehemûl nekin ku yên dîn çekên nukleerî hebin." (ÎLKHA)