Serokwezîrê Sûdanê Kamil Îdrîs, li Konseya Ewlekariyê ya Neteweyên Yekbûyî di gotarekê de ragihand ku wan di bin çavdêriya navneteweyî û herêmî de pêşniyara agirbestek berfireh kiriye, û tekez kir ku şer ziyanek pir mezin daye welat.

Serokwezîrê Sûdanê Kamil Îdrîs, di axaftina xwe ya li Konseya Ewlekariyê de ragihand ku wan di bin çavdêriya Neteweyên Yekbûyî, Yekîtiya Efrîqayê û Lîga Ereban de planeke agirbestê ya berfireh pêşkêş kirine.

Îdrîs diyar kir ku pêşniyar bêçekkirina komên çekdar û pêkanîna bernameyên bêçekkirin û ji nû ve entegrekirina ji bo hêmanên ku di pevçûnan de beşdar in lê sûc nekirine, dihewîne û got, "Bêyî hesabpirsînê aştî çênabe."

Îdrîs her wiha daxwaza diyalogeke berfireh di navbera gelê Sûdanê de di dema veguhêz de kir û xwest ku pêvajo bi hilbijartinên giştî yên di bin çavdêriya navneteweyî de bi dawî bibe. Wî ev destpêşxerî wekî "bijarteyeke hişmendane ku armanc dike kaosê bi rêkûpêk, tundûtûjiyê bi qanûnê û bêhêvîtiyê bi hêviyê biguhezîne" bi nav kir.

Ji aliyekî din ve, Emrîkayê di bin rêveberiya Donald Trump de, piştgiriya xwe ji bo plana agirbesta mirovî ragihand û bang li aliyan kir ku bê şert û merc qebûl bikin.

Şerê ku ji Nîsana 2023an vir ve berdewam dike, krîza mirovî ya li Sûdanê kûrtir dike, dibe sedema mirina bi deh hezaran û koçberbûna nêzîkî 13 milyon kesan. (ÎLKHA)