Rejîma sîyonîst ku êrîşên xwe yên li ser Xezzeyê didomîne, vê carê li Xan Yûnisê Nexweşxaneya Nasir û konên penaberan ên li bakur hedef girt. Di êrîşan de gelek kes, di nav wan de rojnamevan Hasan Îsleîh jî hebû, şehîd bûn.

Rejîma sîyonîst ku êrîşên xwe yên li ser Xezzeyê didomîne, di saetên serê sibê de Navenda Pizîşkî ya Nasir li Xan Yûnisê hedef girt. Li gorî çavkaniyên herêmî, di encama bombebaranên li qata sêyemîn a nexweşxaneyê de gelek Filistînî şehîd û birîndar bûn.

Rojnamevan Hasan Îsleîh, ku demek dirêj bû hewl dida cîhanê li ser trajediya mirovî ya li Xezzeyê agahdar bike, di êrîşê de şehîd bû. Îsleîh di dema êrîşê de li nexweşxaneyê dihat dermankirin.

Balafirên rejîma sîyonîst her wiha konê sîvîlên aware li herêma El-Umûdiyê ya bakurê Xezzeyê bombebaran kirin. Di êrîşê de 3 Filistînî şehîd bûn û gelek kes jî birîndar bûn.

Êrîşeke bi heman rengî konekî din ê penaberan li rojavayê Xan Yûnisê kir hedef. Di êrîşê de 3 Filistînî hatin kuştin û birîndar bûn.

Her wiha, balafirên rejîma îşxalker ambarek li Kampa Penaberan a Şatî ya rojavayê bajarê Xezzeyê bombebaran kirin. Li gorî raporê, êrîş bi giranî li herêmên bakurê Xezzeyê têne kirin.

Her çiqas êrîşên rejîma îşxalker ên li ser sazîyên tenduristiyê, rojnamevan û sîvîlan rastî berteka civaka navneteweyî tên jî, rewşa mirovî ya li Xezzeyê roj bi roj xirabtir dibe. (ÎLKHA)