Îranê îddîaya Trump a ku digot "Tehran danûstandinan dixwaze" red kir. Berdevkê Wezareta Karên Derve ragihand ku ti daxwaza danûstandinan, ji Emrîkayê re nehatiye şandin. Wezîr Arakçi pirsî, "Di bin van şert û mercan de em çawa dikarin baweriya xwe bi danûstandinan bînin?"

Tehranê, ji daxuyaniya Serokê Emrîkayê Donald Trump a ku gotibû "Îran dixwaze bi me re hevdîtinê bike" bi tundî bersiv da. Berdevkê Wezareta Derve ya Îranê Îsmaîl Bakayî roja Sêşemê got ku ti daxwaza hevdîtinê ji Emrîkayê re nehatiye şandin.

Trump piştî hevdîtina xwe ya roja Duşemê li Qesra Spî bi Binyamin Netanyahu re pêk hat, ji rojnamevanan re got ku danûstandinên bi Îranê re hatine plankirin. Trump got, "Îran dixwaze bi me re hevdîtinê bike, ew li çareseriyekê digerin," û diyar kir ku danûstandin ew ê pêk werin, lê dem û cih hêna nehatine diyarkirin.

Lêbelê, Tehranê bi eşkereyî van gotinan red kir. Berdevkê Wezareta Derve yê Îranê Bakayî diyar kir, "Me ti daxwaza hevdîtin an têkiliyê ji Emrîkayê re negotiye," û daxuyaniyên Trump rastiyê nîşan nadin.

"Em çawa dikarin baweriya xwe bi danûstandinan bînin?"

Wezîrê Derve yê Îranê Ebbas Arakçî di gotarekê de ku ji bo rojnameya Brîtanî Financial Times nivîsandiye, bal kişand ser bêbaweriya Emrîkayê. Arakçî got, "Di demên dawî de em peyamên ku dibêjin Emrîka amade ye vegere ser maseya danûstandinan distînin," û gumanên xwe bi pirsa "Lêbelê, em çawa dikarin wekî Îran baweriya xwe bi danûstandinek nû bînin?" anî ziman.

Arakçi êrîşên leşkerî yên li dijî Îranê, nemaze yên di hefteyên dawî de, bi bîr xist û destnîşan kir ku di vê rewşê de danûstandinên samîmî ne mimkûn in.

Di 13ê Hezîranê de, rejîma sîyonîst bi hinceta "astengkirina hilberîna çekên atomî" êrîşeke berfireh a asmanî li dijî Îranê da destpêkirin. Piştî vê êrîşê, Emrîka di 22ê Hezîranê de tevlî şer bû û tesîsa atomî ya Fordo li başûrê paytext Tehranê û her wiha tesîsên dewlemendkirina uranyûmê li Îsfehan û Natanzê hedef girt.

Her çiqas rêjeya zirara êrîşê hêna ne diyar bûye jî, Îranê hevkariya xwe ya bi Ajansa Navneteweyî ya Enerjiya Atomî re rawestand. (ÎLKHA)