Alîkarê Serokê Giştî yê ÎTTÎHADUL ULEMAyê Mele Abdûlquddus Yalçin û Alîkarê Serokê Giştî yê Karwana Hêvîyê Erdal Elîbûyûk ku ji bona beşdarî Meşa Xezzeyê ya Kûrewî bibin çûbûn Misirê, ji Stenbolê re vegerîyan.

Yalçin û Elîbûyûk di seatên êvarê de hatin Balafirgeha Sabîha Gokçenê û li wê derê jî ji teref rayedarên Weqfê û welatîyan ve hatin pêşwazîkirin, derheqê rewşa li wê derê de jî daxuyanîyan dan.

Alîkarê Serokê Giştî yê ÎTTÎHADUL ULEMAyê Mele Abdûlquddus Yalçin destnîşan kir ku li balafirgehê bi taybetî pasaportê mirovên ku ji Tirkîyeyê diçûn dihatin girtin, 3-4 seat dihatin sekinandin û hebo hebo wan digirtin nav pirsyarîyê, Yalçin îfade kir ku ew dema ku pasaportên xwe ji wan girtine çûne otêlê encax li wê derê jî di nav qereqolekê ku ji berê ve hatîye çêkirin de bûne.

“Di nav otêlê de qereqol danîbûn”

Yalçin, “Dema ku em çûn otêlê me dît ku mirovên li otêlêbûn hebo hebo ji otêlê dihatin girtin û wan dibirin. Dûre eşyayên me belawela kirin ku ka di nav de çi heye an jî tineye. Dûre me jî girtin û me kirin nav mînîbûsekî û nîv seat me dan sekinandin. Dema ku me kirin nav mînîbûsê me got qey ew ê me dersînor bikin. Hinek dinê jî me dan sekinandin û pasaportên me dan me, û ji me re gotin ‘nekevin nav meseleyên sîyasî!’ û me dîsa şandin otêlê. Ên payebilind çûn, ên ku man jî heta seatên dereng li ber otêlê disekinîyan. Û zexta psîkolojîkî li me dikirin.”

“Ji bona ku bi rehetî dikaribin kontrol bikin, me kirin sê parçe”

Yalçin destnîşan kir dema ku ew ji bona meşê ketine nav bajara Îsmaîlîyeyê hemû kesan dane sekinandin, hinek mirov tenê xwe xelas kirin û ketin nav bajêr, “Ev rewş planeke hikûmetê bû. Ji bona ku me bi rehetî dikaribin kontrol bikin, me kirin sê parçe. Di noqteya duyemîn de me dan sekinandin. Midexeleya wan a dawîn gelek dijwar bû. Li Refahê rewş weka berêye… Yên ku dixwestin biçûna li wê derê ji ber ku nikaribûn biçûna tiştek ku were guhertin çênebû.”

Abdulquddus Yalçin destnîşan kir ku ji 56 welatên cuda 6 hezar û 500 însan ji bona ku destekê bidin meşê li Misirê bûn, ji ber muameleya xerab a hikûmeta Misirê armanca ku dihat hedefkirin nehat bicîhanîtin.

“Bi taybetî gelek aktîvîstên ku ji Tirkîyeyê çûbûn hatin revandin, dûçarê zextê bûn, û hatin dersînorkirin”

Alîkarê Serokê Giştî yê Karwana Hêvîyê Erdal Elîbûyûk, “Me li wê derê gelek tiştan dît û jîyand. Lê em naxwazin ku bala meseleyê li ser wan tiştan bê kişandin. Ji bona ku ev meş bê astengkirin ji serî ve midexeleyên dijwar hatin kirin. Em tu dem wek însanên ku ji bo geştyarîyê çûne li wê derê nehatin pêşwazîkirin. Bi taybetî gelek aktîvîstên ku ji Tirkîyeyê çûbûn hatin revandin, dûçarê zextê bûn, û hatin dersînorkirin. Ji mirovên ku ji Tirkîyeyê çûbûn re muameleya terorîstan hat kirin ev rewş jî nedihat qebûlkirin.”  (ÎLKHA)