Kompaniya "Bazan Group" a rejîma îşxalker ragihand ku zirara êrîşa mûşekî ya Îranê li ser rafineriya petrolê û şirketên girêdayî wê li Kendava Heyfayê di navbera 150 û 200 milyon dolarî de ye.

Şîrketê di daxuyaniyekê de ji Borsaya Tel Avîvê re ragihand ku wan ji bo destpêkirina tamîrkirina hinek zirarê pereyek pêşîn a 160 milyon şekel (nêzîkî 48 milyon dolar) wergirtiye. Şîrketê destnîşan kir ku ev pere bi tevahî zirarên rasterast vedihewîne, lê ew bi fona tezmînatê re dixebite heta ku wekî beşek ji hewildanên ji nû ve avakirinê tezmînatên zêdetir peyda bike.

Armanca êrîşê yekîneya hilberîna enerjiyê ya rafineriyê bû, ku berpirsiyarê hilberîna buhar û elektrîkê bû. Ev yekîne ji bo xebitandina tesîsê girîng e. Şîrketê diyar kir ku nirxandina zirarê niha di merhaleya nirxandina destpêkê de ye û li ser bingeha agahdariya berdest û planên karsaziyê yên heyî ye.

Şîrketê diyar kir ku ji nû ve destpêkirina operasyonan piştî rawestandina ji nişka ve ji ber sedemek derveyî pêvajoyek pir tevlihev e û lêçûn û tezmînata dawîn a ku were wergirtin hêna jî ne diyar e.

Di vê êrîşa mûşekî ya Îranê de sê îşxalker hatin kuştin. Dema ku beşek ji avahiyê hilweşiya, ew di yek ji odeyên hundir ên herî parastî yên tesîsê de asê man, di bin kavilan de man û rastî dûmana dijwar û germahiyên bilind hatin. (ÎLKHA)