Parêzgarê Tulkeremê Abdullah Kemil ji civaka navneteweyî xwest ku destwerdana lezgîn bikin da ku fermana leşkerî ya ku hilweşandina 25 avahiyên li Kampa Penaberan a Nur Şams ferz dike rawestînin.

Rejîma sîyonîst fermanek leşkerî ya nû derxist ku tê de fermana hilweşandina 25 avahiyên niştecîhî li Kampa Penaberan a Nur Şems li Tulkeremê, dide. Ev biryar rasterast bi sedan Filistîniyên ku li kampê û derdora wê dijîn tehdît dike.

Parêzgarê Tulkeremê Abdullah Kemil daxuyaniyek nivîskî weşand û bang li civaka navneteweyî, rêxistinên mafên mirovan û şandeyên dîplomatîk kir ku tavilê vê biryarê rawestînin. Kemil tekez kir ku ev gava îşxalkeran beşek ji polîtîkayeke demdirêj a êrîş û wêrankirinê li Tulkerem û kampên Nur Şems e.

Waliyê Kemil diyar kir ku ev pêkanînên îşxalkeran li dijî wargehên sîvîl bi awayekî sîstematîk berdewam dikin, û hedefgirtina malan hewldanek eşkere ye ji bo koçberkirina bi zorê ya niştecihên kampê. Wî bi bîr xist ku gelek malbat ji ber van êrîşan neçar mane ku malên xwe biterikînin.

Daxuyaniyê tekez kir ku fermana hilweşandinê bi awayekî eşkere li dijî qanûnên navneteweyî, qanûnên mirovî yên navneteweyî û peymanên mafên mirovan e. Kemil diyar kir ku divê gavên berbiçav û bibandor werin avêtin da ku êrîşên berdewam ên li bajarê Tulkerem, kampên penaberan, bajarok û gundan werin rawestandin.

Tê diyarkirin ku polîtîkayên wêrankirin û derxistina bi zorê yên dagirkeran li Şerîaya Rojava beşek ji planeke berfirehtir e ku armanca wê koçberkirina gelê Filistînî ji axên wan e û hişyariyek hatiye dayîn ku biryara dawî ya derbarê Kampa Nur Şems de dê rewşa mirovî ya li herêmê hîn xirabtir bike. (ÎLKHA)