"Panela Navneteweyî ya Selaheddîn û Qudsê" ku ji aliyê HUDA PARê ve bi mijara "Qudsa Selaheddîn" tê lidarxistin, ew ê sibê li navçeya Xelîlî ya Rihayê were lidarxistin. Serokê HUDA PARê Zekerîya Yapicioglu jî ew ê beşdarî panelê ku tê de Selaheddîn Eyyûbî, Quds, Mescîda Eqsayê û geşedanên li Xezzeyê wê di bin sernavên cûrbecûr de werin nîqaşkirin bibe.

"Panela Navneteweyî ya Selaheddîn û Qudsê" ku ji aliyê HUDA PARê ve ji bo bîranîna salvegera fetha Qudsê tê lidarxistin, ew ê roja Înê, 2ê Cotmeha 2026an, saet 14:00an de li Hola Konferansê ya Navenda Çand û Ciwanan a Şaredariya Xelîlîyê were lidarxistin.

Bername ew ê bi moderatoriya Serokê Platforma Qudsa Azad Suleyman Kizilçinar ve were kirin.

Di panelê de, Profesor û Nivîskar Prof. Dr. Ahmet Agirakça ew ê gotara xwe ya bi navê "Edaleta Selaheddîn li Qudsê û Testa Sîstema Navneteweyî li Xezzeyê" pêşkêş bike.

Sekreterê Giştî yê Foruma Edalet û DemokrasiyêAzzam El-Eyyubî, wê di bin sernavê "Avakirina Nifşek Xilaskaran: Perwerde, Ciwan û Modelek ji bo Çêkirina Kesayetiyên Mînak" de li ser mijarên perwerde û ciwanan raweste.

Serokê Yekîtiya Alimên Xezzeyê Dr. Merwan Ebû Asim, dê bi pêşkêşiyek bi sernavê "Rewşa Mescîda Eqsayê û Mudaxeleyên li dijî Pêkhateya Demografîk a Qudsê" ji beşdaran re biaxive.

Endamê hîndekariyê yê Beşa Dîrokê ya Fakulteya Wêjeyê ya Zanîngeha Mardin Artuklu Profesor Dr. Ziya Polat, wê di bin sernavê "Exlaq, Asketîzm, Bexşîn û Taybetmendiyên Serokatiyê yên Selaheddîn" de ji perspektîfên cûda li ser Selahedîn Eyyubî nîqaş bike.

Panela ku akademîsyen, lêkolîner, zanyar, rêberên raya giştî yên herêmî û biyanî lê hatine dawetkirin, ew ê rewşa Qudsê û pêşketinên li Xezzeyê, digel mînaka Selaheddîn, nîqaş bike. (ÎLKHA)