ئەمڕۆ دۆناڵد ترامپ سەرۆکی هەڵبژێردراوی ئەمریکا سوێندی یاسایی دەخوات و بە فەرمی دەستبەکار دەبێت.

ترامپ کە لە ٥ی تشرینی دووەمی ٢٠٢٤ لە هەڵبژاردنەکانی سەرۆکایەتی ئەمریکادا سەرکەوتنی بەدەستهێنا و بووە ٤٧هەمین سەرۆکی ئەمریکا ئەمڕۆ دوای مەراسیمی سوێندخواردن بۆ دووەمین جار وەک سەرۆکی وڵات دەگەڕێتەوە کۆشکی سپی.

دەستنیشان کرا، بەهۆی ساردی زۆر لە واشنتۆنی پایتەخت ئاهەنگی سوێندخواردنەکە لە باغچەی کۆنگرێسەوە گواسترایەوە بۆ ناوەوەی بینای کۆنگرێس.

دوای سەردانکردنی کڵیسای مێژوویی ست جۆن، ترامپ و هاوسەرەکەی لە مەراسیمی تەقلیدی لە کۆشکی سپی ماڵئاوایی لە جۆ بایدن و جیل بایدنی هاوسەری دەکەن.

ترامپ لەبەردەم دادوەری باڵای دادگای باڵا جۆن ڕۆبەرتس، کاتژمێر ١٢:٠٠ی پاشنیوەڕۆ سوێندی یاسایی دەخوات و دواتر ترامپ یەکەم وتاری خولی دووەمی خۆی پێشکەش دەکات.

دوابەدوای ئەو مەراسیمە، ترامپ هەندێک بەڵگەنامەی فەرمی پەیوەست بە سەرۆکایەتییەکەی لە بینای کۆنگرێس پڕدەکاتەوە و میوانداری نانخواردنی نیوەڕۆی تەقلیدی بۆ ئەندامانی کۆنگرێس دەکات.

دوای مەراسیمەکە و دانیشتنەکانی کۆنگرێس، ترامپ بەرەو کاپیتال ون ئارێنا دەڕوات و لەوێ قسە بۆ لایەنگرانی دەکات.

دواتر دەچێتە کۆشکی سپی، لە یەکەم ڕۆژی خولی دووەمی سەرۆکایەتیدا چەندین فەرمانی جێبەجێکردن واژۆ دەکات.(İLKHA)