ئاگر لە کۆگایەکی کیمیایی و کارگەیەکی جلوبەرگ لە بەنگلادیش کەوتەوە و بەهۆیەوە ١٦ کەس گیانیان لەدەستدا.

لە شاری داکای پایتەختی بەنگلادیش ئاگر لە کارگەیەکی جلوبەرگ و کۆگایەکی ماددە کیمیاییەکان کەوتەوە و بەهۆیەوە ١٦ کەس گیانیان لەدەستدا.

بەپێی هەواڵی میدیا ناوخۆییەکان، ئەو دوو باڵەخانەیە لە بەرامبەر زانکۆی بازرگانی و تەکنەلۆجیای بەنگلادیش شان بە شانی یەکتر وەستاون.

ئاماژە بەوەشکراوە، ئاگرەکە لە کارگەیەکی جلوبەرگی حەوت نهۆمیدا کەوتووەتەوە، لە نهۆمی سێیەمەوە دەستیپێکردووە و تاڕادەیەکی زۆر کوژاوەتەوە.

بەڵام ئاماژە بەوە کراوە کە تیمەکانی ئاگرکوژێنەوە زۆر کاریان کردووە بۆ ئەوەی بە تەواوی ئەو ئاگرە کۆنترۆڵ بکەن کە لە کۆگای کیمیاییدا کەوتووەتەوە کە ماددە مەترسیدارەکانی وەک تۆزی سپیکەرەوە و پلاستیک و پەرۆکسایدی هایدرۆجین تێیدا هەڵگیراون.

بەرپرسێکی ئاگرکوژێنەوە ڕایگەیاند، ئەگەری زۆرە ژمارەی گیانلەدەستدان بەهۆی ئاگرەکەوە بەرزبێتەوە.

تا ئێستا هۆکاری ئاگرکەوتنەوەکە دیاری نەکراوە و تا ئێستا بەرپرسانی ئەمنی هیچ لێدوانێکیان لەبارەی ڕووداوەکەوە نەداوە.(İLKHA)