دۆنالد ترامپ، سەرۆکی ویلایەتە یەکگرتووەکانی ئەمریکا ڕایگەیاند، وڵاتەکەی دوای ٣٠ ساڵ وەستان، تاقیکردنەوەی چەکی ئەتۆمی دەستپێدەکاتەوە. بەیاننامەکەی نیگەرانی جددی سەبارەت بە ئاسایش و سەقامگیری جیهانی هێنایە ئاراوە.

لە ڕێگای گەڕانەوەی بۆ واشنتۆن دوای دیدار لەگەڵ شی جینپینگ سەرۆکی چین لە کۆریای باشوور، ترامپ ئاماژەی بەوەدا کە ئەم هەنگاوەی ناوە بۆ ئەوەی لەگەڵ رووسیا و چین یەکسان بێت و وتی، "ئێستا کاتێکی گونجاوە."

هەروەها ترامپ ئەو ڕاگەیاندنەی لە پلاتفۆرمی سۆشیال میدیای خۆی بەناوی "تروت سۆشیال" بڵاوکردەوە و ئیدیعای کرد کە بڕیارەکە لە وەڵامی بەرنامەکانی تاقیکردنەوەی وڵاتانی دیکە دراوە. دۆنالد ترامپ وتی، "بەهۆی بەرنامەکانی تاقیکردنەوەی وڵاتانی دیکەوە، وەزارەتی جەنگم ڕاسپاردووە کە چەکی ئەتۆمیمان لەژێر هەلومەرجی یەکساندا تاقیبکاتەوە، دەستبەجێ پرۆسەکە دەست پێدەکات."

بەڵام کۆشکی سپی ڕەتیکردەوە وەڵامی پرسیارەکان بداتەوە سەبارەت بە وردەکارییەکانی بڕیارەکە، بەرپرسانی پنتاگۆنیش بە فەرمی هیچ لێدوانێکیان لەسەر لێدوانەکانی ترامپ نەداوە.

شارەزایان ترسیان هەیە ئەم بڕیارەی ئیدارەی ترامپ ببێتە هۆی گەڕانەوە بۆ پێشبڕکێ ئەتۆمییە مەترسیدارەکەی جەنگی سارد. ڕەخنەگران دەڵێن ئەم هەنگاوە سەقامگیری نێودەوڵەتی تێکدەدات.(İLKHA)