لە ناوچەی پەنجابی پاکستان بەهۆی پێکدادانی پاسێک لەگەڵ بارهەڵگرێک، ١١ کەس گیانیان لەدەستدا و ٣٣ کەسیش بریندار بوون.

ڕووداوەکە لە ناحیەی پاکپاتان لە پارێزگای پەنجاب لە ڕۆژهەڵاتی پاکستان ڕووی داوە و پاسێک کە لە موڵتانەوە بەرەو کاسور دەچوو، خۆی کێشاوە بە بارهەڵگرێکی خێرا.

بەپێی ئاماری تیمی فریاگوزاری ڕزگارکردنی ١١٢٢، لە ڕووداوەکەدا لانیکەم ١١ کەس گیانیان لەدەستداوە و ٣٣ کەسیش بریندار بوون.

بریندارەکان بۆ چارەسەری پزیشکی بەپەلە گواستراونەتەوە بۆ نەخۆشخانەکانی نزیک، و باس لەوە دەکرێت باری تەندروستی هەندێکیان ناجێگیرە.

پۆلیس ئاماژەی بەوەشکرد، تا ئێستا ناسنامەی کوژراو و بریندارەکان بە فەرمی پشتڕاست نەکراوەتەوە و تا ئێستا هۆکاری دروستی پێکدادانەکە ڕوون نییە.(İLKHA)