Berdevkê Hêzên Çekdar ên Îranê ragihand ku bi tevî rejima sîyonîst Emrîka jî li pişt êrîşa Tehranê ye. Berdevk bal kişand ku her du welat ew ê "şîrmaqek mezin" bistînin.

Berdevkê Hêzên Çekdar ên Îranê, Tuxgeneral Ebulfazl Şikarçî ragihand ku rejîma sîyonîst di êrîşên xwe yên hewayî yên dawî yên li ser Îranê de bi tena serê xwe tevnegeriyaye û ev êrîş bi piştgiriya Emrîkayê hatine kirin.

Şikarçî di axaftina xwe de ji televîzyona dewletê ya Îranê re got, "Êrîş ne tenê karê rejîma sîyonîst in. Ev êrîşên terorîstî bi îstîxbarata rasterast û piştgiriya lojîstîkî ya Emrîkayê hatine kirin."

Tuxgeneral Şîkarçî bal kişand ku Îran piştî êrîşan amadekariyên tolhildana stratejîk dike û got, "Emrîka û rejîma sîyonîst ew ê ji bo vê xiyanetê bedelên giran bidin. Em ê şîrmaqekî xurt û nayê jibîrkirin bidin wan."

Êrîşên rejîma sîyonîst li ser axa Îranê bûn sedema şehîdbûna çend kesayetên leşkerî yên pilebilind û zanyarên navokî. Hikûmeta Îranê êrîşan wekî "kiryarek şer a dijminane ku bi eşkereyî qanûnên navneteweyî îxlal dike" bi nav kir û ew wekî komployek ji bo hedefgirtina aramiya herêmê bi nav kir.

Tuxgeneral Şîkarçî jî xîtabî gelê Îranê kir û got, "Xwîna şehîdên me ew ê li erdê nemîne. Divê dijminên me bizanin ku miletê Îranê teslîm nabe; berevajî vê, ew bersiva êrîşan dide û her tim li kêleka mezlûman li dijî zordaran radiweste."

Wezareta Parastinê ya Îranê ragihand ku piştî êrîşan rewşa hişyariya bilind berdewam kiriye, pergalên parastina hewayî hatine aktîfkirin û hemû yekîneyên leşkerî li hember gefên muhtemel di hişyariyê de ne. (ÎLKHA)