Koordînatortîya Cizîr a Weqfa Evîndarên Pêxember, li navçeyê bernameya Mewlûda Nebî tertîp kir û ji rayedarên Weqfa Evîndarên Pêxember Nasuh Sevînîk axavtinek kir. Sevînîk di bernameyê de weha got, “Ev wîladeta Pîroz ji bo alema beşerîyetê mizgînîya rêber û pêşevayê berxwedan û azadîyêye. Ev wîladeta pîroz newroz e ji bo serhildana li hemberî tarîtî û zilmê.”

Weqfa Evîndarên Pêxember, di çarçoveya “Jîyandin û Fêhmkirina Sunneta Hezretî Muhammed” de her sal bernameyên Mewlûda Nebî tertîp dike, Weqf, vê salê jî bi şîara “Rêberê Berxwedanê Hezretî Muhammed” bernameyan da destpêkirin.”

Li ser navê Weqfa Evîndarên Pêxember Şêx Nasuh Sevînîk, di bernameyê de axavtina vekirinê kir.

Sevînîk îfade kir ku ew bi gihaştina vê Mewlûda Pîzor gelek kêfxweş in û got, “Em wek Evîndarên Pêxember, dîsa bi fesleke biharê de, bi hatina sersal û newroza wîladeta pîroz, şad û bextewar in. Bi temaya ‘Rêberê Berxwedanê Hz. Muhammed’ bernameya xwe didin destpêkirin.”

Sevînîk, “Mezra Bota bi hatina we û vê roja pîroz mûşerref û bextewer e. Ji welatê duyemîn, navend û çavkanîya belavbûna însanîyetê ku bûye mezherê dua Nuh nebî ku daxwaz kirîye ‘Xwedayê min, min li cîhekî pîroz û bibereket bicîh bike’. Ji Bîladê Cudî, ji Mezra Bota selam li ser te be Ey Rehberê berxwedan û azadîyê. Selam li welatê îlm, îrfan û eşqê. Selam ji navenda tarîx û ferhengê. Selam ji asûmanê stêrkên şiîr û edebîyatê. Selam li ser te be ji Gulê Baxê Îremê Bota Ya Resulallah. Em jî bizarê şevçiraxê Kurdistan Melazê Cizirî, dizarînin û diqêrînin, ‘Îro ji Cemala te dilê min bibirîn e. Allah çi hebîb û çi tebîb û wekevîn e.’”

“Pêxemberên Xwedê însanîyetê ji tarîtîyê derxistine ronahîyê”

Şêx Nasuh Sevînîk, “Ev wîladeta Pîroz ji bo alema beşerîyetê mizgînîya rêber û pêşevayê berxwedan û azadîyêye. Ev wîladeta pîroz newroz e ji bo serhildana li hemberî tarîtî û zilmê. Û mizgîna azadî û serfirazîyê ye ji bo hemû hejzar û mezlumên bindestê cîhanê. Lewra wexta em li tarîxa beşerîyetê dinêrin her daîm, Xwedê teala ji bo rêbertîya însanan, li ser rastî edaletê bikin Pêxemberan şandîye. Li hemberî zalim û zordaran rêya berxwedan û qîyamê nîşanê însanan dane û ji wan re rêbertîyê kirine. Ew ji tarîtîyê rizgar kirine û gihandine fecra azadîyê. Fecra silh û selamet, biratî û edaletê.”

“Ji ber ku Misilman ji rêya Xwedê dûr ketine zelîl û perîşan bûne”

Sevînîk, “Kengî însan berê xwe ji rêya Pêxemberan badane, dane pey serok û rêberên sexte ji heqî û edaletê dûr ketine dûçarê zilm û tarîtîyê bûne. Mixabin îro zilm û zordarîya li ser serê mezlum û bindestan dibare, delîle ku însan çiqas ji rêya Xwedê û Pêxemberê wî dûrketine. Hejmarê milyaran misilmanan ji rêya Xwedê û Pêxemberê wî dûrketî, wan ji zilm û zordaran naparêze. Qudretmendên cîhanê ku xwe bi pêşketin û medenîyetên nav didin, heyîna xwe li ser zilm, îşxalkerî, qetlîam û qirkirina millet û welatan didomînin. Ne demokrasîya wan, ne pêşgetin, ne teknolojî û ne medenîyeta wan ji însanîyetê re silh û selametî aşîtî û aramî, edalet û îstîqrarê nayne. Li ber çavên hemû dinyayê qirkirin û wêrankirina Xezzeyê delîlê vêya ye. Qirkirna xelkê Xezzeyê bi her awayê wehşîyane ji teref qudretmendê xwedîyê medenîyet û teknolojîyê, xwedîyê demokrastîyê û mafên mirovan ve tê kirin. Dinya hemû seyr û temaşe dikin û ji xeyrî kulmek însanê xwedîwijdan û Misilmana pêve kes dengê xwe dernaxe. Îro însanîyetê îstîqameta xwe şaş kirîye. Misilmanan ji ber ku dev ji rêya Îslamê berdane zelîl û perîşan bûne”

“Qudretmendê dinyayê jî zalim û xwînxwar bûne”

Sevînîk, “Qudretmendê dinyayê jî zalim û xwînxwar bûne. Ên ku bi salan e bi navê azadî û xelasîyê, bi navê demokrasî û wekhevîyê, bi navê pêşketin û medenîyetê pişta xwe didin quwwet û çek û şîddetê, war û welatên me nifş û ciwanên me wêran û talan kirin.”

“Xelasîya însanîyetê vegera ji rêya Xwedê û Pêxemberê wî ye”

Şêx Nasulh, “Ey gelê Misilmanan, tenê rêya xelasîya însanîyetê ji vê felaketa tevahî ev e ku carekî din em vegerin ser rêya Xwedê û Pêxemberê wî. Wek Evîndarên Pêxember em gazî milletê xwe dikin. Weka ku Xwedê di ayeta Pîroz de dibêje, ‘Hûn hemî xwe bi benê Xwedê, bi Îslamîyetê bigrin û ji hev parçe nebin. Qencîya Xwedê ya ku li ser we bibîrbînin. Dema hûn ji hev re dijmin bûn, merhamet xist navbera qelbê we û we ji hev re kir bira. Hûn li ser kevîya dûjexê bûn, Xwedê hûn wen ji wê xelas kirin. Her wiha Xwedê ayetên xwe ji we re diyar dike ku hûn hîdayetê bibînin.’ Di vê rêyê de hizûr, aramî, biratî, silh û selametî, edalet û îstîqrar heye. Werin em bi hev re xwe ji rê û rêpaçên zalim û zordestan biparêzin. Û xwe bispêrin ferman û gotina Xweda û Pêxemberê wî. Weka stêrka asîmana edebîyata Kurdû Melayê Cizirî, ‘Pişt-i nadîn du hezar xencer û tîr û rim û xişt
Me serî daniye rê û bi Xwedê bestîye pişt.’”

Nasuh Sevînîk di dawîya axavtina xwe de weha got, “Bi hêvîya serkeftin û pîrozîya mezlum û bindestên cîhanê li hember zalim û zordaran, bi hêvîya pîrozî û zefera Quds û milletê Xezzeyê, bi hêvîya biratî û heqî û edaletê ji bo hemû însanîyetê bimînin di nav xêr û xweşîyê de emanetê Xwedê bin.” (ÎLKHA)