Hikûmeta Yemenê ya ku di qada navneteweyî de tê nasîn û koma Ensarullah peymanek îmze kirin ji bo derxistin û guhertina bi hezaran cenazeyên ji her du aliyên şer.

Ebdulqadir el-Murteza, serokê komîteya karûbarên girtiyan a Ensarullahê, li ser platforma medyaya civakî X diyar kir ku peyman kesên ji hemî cepheyên şer û herêmên Yemenê digire nav xwe û ji bo cîbicîkirina wê dê komîteyên meydanî yên hevbeş werin damezrandin.

Hadî Haig, serokê komîteya pevguhertina esîran a hikûmeta Yemenê ya ku di asta navneteweyî de tê naskirin, peyman piştrast kir.

Ev gav piştî rêkeftineke cuda ya roja Sêşemê tê ku tê de serbestberdana 1200 esîrên alîgirên hikûmetê li hember 1700 esîrên Ensarullah, û her wiha 7 welatiyên Siûdî û 23 welatiyên Sûdanî yên ku ji aliyê Ensarullah ve hatine girtin, hebû.

Li gorî Hans Grundberg, Nûnerê Taybet ê Neteweyên Yekbûyî yê ji bo Yemenê, peymana pevguhertina esîran piştî civîneke 12 rojî li Sultanatiya Ummanê pêk hat, û Grundberg peyman wekî "gaveke erênî û watedar ku dê êşa girtiyan û malbatên wan li seranserê Yemenê sivik bike" bi nav kir.

Li Yemenê, tevgera Ensarullah di dawiya sala 2014an de paytext Sana bi dest xist. Koalîsyonek bi pêşengiya Erebistana Siûdî sala din ji bo piştgiriya hikûmeta ku di asta navneteweyî de tê naskirin destwerdanek da destpêkirin.

Agirbesta di navbera hikûmeta Yemenê û koma Ensarullah de, ku bi navbeynkariya NY di Nîsana 2022an de hatibû îmzekirin, piştî şeş mehan bi dawî bû. Lêbelê, ji wê demê ve, her du alî bi piranî "agirbesteke fiîlî" parastine.

Danûstandina dawî ya mezin a girtiyan di navbera her du aliyan de, bi navbeynkariya NY, di sala 2023an de pêk hat û nêzîkî 900 esîr hatin berdan. (ÎLKHA)