Şandeke payebilind a HAMASê li Qahîreya paytexta Misirê, di çarçoveya danûstandinên nerasterast ên bi rejîma sîyonîst re ji bo agirbest û pevguhertina êsîran li Xezzeyê de, hevdîtinan dike.

Şandeyek ji kesayetên girîng ên HAMASê îro çû Qahîreya Misirê da ku rêkeftinek agirbest û danûstandina êsîran pêk bînin.

Li gorî agahiyên ku ji çavkaniyên pêbawer ji malpera "El Arabi El Jadid" re hatine dayîn, kanalên danûstandinên di navbera Qahîre û Hamasê de, ku bi navbeynkariya Tirkîyeyê dest pê kiribûn, piştî hevdîtinên hefteya borî li Enqerê ji nû ve hatine vekirin. Di van hevdîtinan de, şandeyeke Hamasê bi Wezîrê Derve Hakan Fîdan û rayedarên din re civiya da ku li ser çareseriyên gengaz ji bo bidestxistina agirbestekê li Xezzeyê nîqaş bikin.

Hat ragihandin ku Fîdan li ser daxwaza fermî ya Tirkiyeyê di serdana xwe ya Misirê de bi Serokkomarê derbekar Ebdulfettah el-Sîsî re civiya û piştgiriya xwe ji bo ji nû ve avakirina têkiliyê bi HAMASê re anî ziman.

Her wiha hate destnîşankirin ku Misir, di bin zexta aktorên herêmî û rewşa aloz a sîyasî û leşkerî ya li Filistînê de, amade ye ku şandeya Hamasê li Qahîreyê mazûvan bike. Ev destpêşxerî wekî beşek ji hewldanên wê yên ji bo rawestandina qirkirinê li Xezzeyê û hêsankirina gihandina alîkariyên mirovî bo herêmê tê hesibandin.

HAMAS, di daxuyaniyek berê de, diyar kir ku ew ji bo pêkanîna agirbestekê nermbûn û avakeriyê nîşan dide û amade ye ku hemî gavan bavêje da ku şer rawestîne û îşxalkeran neçar bike ku vekişin. Di nav mijarên sereke yên ku hatin destnîşan kirin de, berdana girseyî ya hemî êsîran bû.

Ev hewldanên danûstandinan di demekê de tên ku rejîma sîyonîst plana xwe ya îşxalkirina Xezzeyê ya berfireh eşkere dike. Hikûmeta îşxalker pêkanîna planên xwe yên leşkerî ragihandiye, ku tê de ajotina nifûsa Xezzeyê ber bi başûr û dorpêçkirina wê, û her weha destpêkirina êrîşên bejayî yên berfireh li ser bajêr hene.

Plana ku ji teref kabîneya ewlehiyê ya serokwezîrê rejîma sîyonîst, Benyamin Netanyahu ve hatiye pejirandin, tê de heye ku kontrolkirina tam a bajêr dê bi mehan bidome û bi beşdariya zêdetirî şeş tûgayên leşkerî were kirin.

Plan armanc dike ku bi qasî milyonek mirovên li Xezzeyê bi zorê werin veguhastin bo "navendên komkirinê" yên li dora Xan Yûnisê, xalên belavkirina alîkariya mirovî werin avakirin û dû re jî êrîşên bejayî werin destpêkirin. Tê texmînkirin ku ev pêvajo bi qasî mehek û nîvekê bidome. (ÎLKHA)