Çavkanîyên ewlehîyê yên Sûrîyeyê ragihandin ku komên çekdar ên li Siwêdayê agirbest îxlal kirin û êrîşî xalên ewlehîyê kirin, di heman demê de hêzên ewlehîyê bersiv dan deverên ku agir lê hatiye vekirin.

Li bajarê Siwêdayê yê başûrê Sûrîyeyê dîsa alozî zêde bûye. Li gorî ajansa nûçeyan a fermî ya Sûrîyeyê SANA, çavkanîyên ewlehîyê ragihandin ku "komên serhildêr" agirbesta li xeta Vilgayê îxlal kirine û xalên ewlehiyê kirine hedef.

Çavkaniyê got, "Hêzên ewlehîya navxweyî tavilê bersiv dan deverên ku agir lê hatibû vekirin û li çeperên serhildêran dan."

Agirbesta nazik a li Siwêdayê, ku ji Tîrmeha borî ve di meriyetê de ye, ji ber êrîşên çekdarî yên dubare di bin tehdîdê de ye. Herêm piştî zêdetirî hefteyekê di navbera komên Durzî yên ku ji teref rejîma sîyonîst ve têne piştgirî kirin û eşîrên bedewî de pevçûnên ku di encamê de bi sedan kes mirin, ketibû nav rewşek aram a nisbeten baş.

Wezîrê Derve yê Sûrîyeyê Esed El-Şebanî di nîvê meha Îlonê de ragihand ku ew li Şamê bi Wezîrê Derve yê Urdunê Eymen El-Sefadî û nûnerê taybet ê Emrîkayê yê ji bo Sûrîyeyê Tom Brack re civiya da ku pêvajoyek lihevhatina neteweyî li başûrê welat bidin destpêkirin. Di vê civînê de, "Plana çareseriya Swêydayê" ya ji heft xalan pêk tê, ku bi piştgiriya Urdun û Emrîkayê hatibû îmzekirin, hat pejirandin.

Lêbelê, nebûna baweriyê di navbera komên li ser erdê û destwerdana derve pêkanîna planê tevlihev dike. Bi taybetî rejîma sîyonîst bi hinceta "parastina Durzîyan" êrîşên xwe yên li ser axa Sûrîyeyê zêde dike, di heman demê de hikûmeta Şamê vê yekê wekî destwerdanek eşkere di karûbarên navxweyî yên welat de bi nav dike û daxwaza pabendbûna bi peymana agirbestê ya 1974an dike.

Hikûmeta Sûrîyeyê piştî hilweşandina rejîma Beşar Esed di 8ê Kanûna Pêşîn a 2024an de, ji bo vegerandina ewlehiyê li seranserê welat dixebite. Wezareta Karên Hundir ragihand ku ji wê demê ve wan li gelek herêman depoyên dermanan û tesîsên hilberînê kontrol kirine û rejîma berê di serî de berpirsiyarê van toran e. (ÎLKHA)