Her çiqas danûstandinên ji bo derbasbûna ewle ya endamên Hamasê yên di tunela Refahê de asê mane berdewam dikin jî, nakokiyên sîyasî yên di nav rejîma sîyonîst de pêvajoyê asteng dikin. Pêşniyara Netanyahu ya ji bo destûrdayîna derbasbûnê di nav hikûmetê de rastî nerazîbûnê hat.

Çavkaniyên HAMASê ragihandin ku ji bo garantîkirina derbasbûna ewle ya şervanên berxwedanê yên ku di tunelekê de li bajarê Refahê yê başûrê Xezzeyê asê mane, têkiliyên bi navbeynkaran re berdewam dikin.

Berpirsekî Hamasê di hevpeyvînekê de bi televîzyona El-Aqsayê re diyar kir ku rejîma sîyonîst hewl dide bi rêya medyayê bi zanebûn agahiyên ku şervanên di tunelên Refahê de asê mane ew ê ji wan re rê were dayîn ku derbas bibin ve, raya giştî bixapîne.

Çavkaniyên Emrîkî û sîyonîst ên ku ji malpera Axios a Amerîkî re axivîn, ragihandin ku Washingtonê ji bo endamên HAMASê rêyek ewle ji deverên ku di bin kontrola rejîma sîyonîst de ne ber bi deverên di bin kontrola HAMASê de pêşkêş kiriye.

Li gorî çapemeniya îşxalker, Serokwezîrê kujer Benyamin Netanyahu îhtîmala ku bi qasî 200 endamên Hamasê ji tunelên Refahê derkevin, anî ziman. Lêbelê, ev pêşniyar ji aliyê hinek wezîrên hikûmetê ve rastî rexneyên tund hat û hêna jî biryar nehatiye dayîn.

Televîzyona Kanala 12 îddîa kir ku heke endamên HAMASê çekên xwe radest bikin, dibe ku destûr bê dayîn ku derbas bibin. Çavkaniyên nêzîkî artêşa îşxalker her wiha destnîşan kirin ku dibe ku destûr bê dayîn ku endamên HAMASê yên di tunelan de di berdêla radestkirina cenazeyên bêtir êsîran ji hêla HAMASê ve derbas bibin.

Lê belê, ofîsa Netanyahu red kir ku di berdêla derxistina endamên HAMASê ji tunelan de ti rêkeftineke bazirganî hatibe kirin.

Artêşa rejîma sîyonîst ji bo veqetandina deverên ku li Refahê kontrol dike ji yên ku di bin kontrola Hamasê de ne, xêzek sînorî ya bi navê "xeta zer" ava kir. Ev xêz çareserkirina krîza tunelên li Refahê hêna jî bêtir aloz dike. (ÎLKHA)