Berî ku agirbest were ragihandin, Tûgayên Qessam û Serîyyeyên Quds wesayîtên îşxalkeran hedef girtin û droneke sîxurî desteser kirin.

Tûgayên Îzzeddîn el-Qessam, baskê leşkerî yê Hamasê, doh ragihand ku mucahîdên wan bi rokêta Yasîn 105, tankeke Merkava ya îşxalker li herêma Yarmûk a bakurê Xezzeyê bi serkeftî xistine.

Di heman çarçoveyê de, Serîyyeyên Qudsê, baskê leşkerî yê Tevgera Cîhada Îslamî, ragihand ku şervanên wan bi topên hawanê li nêzî Talat el-Muntar li rojhilatê Xezzeyê kombûbûn û wesayîtên leşkerên îşxalkeran hedef girtine. Di daxuyaniyê de her wiha hate destnîşankirin ku wan di dema operasyonê de bi serkeftî droneke sîxurî ya siyonîst desteser kiriye.

Medyaya Îbranî doh ragihand ku komek şervanên berxwedanê hewl dan li bajarê Xezzeyê leşkerên îşxalker bigirin.

Li gorî çavkaniyên Îbranî, heşt serhildêran êrîşî cihekî leşkerî yê sîyonîst li bajêr kirin. Piraniya wan piştî pevçûnek bi hêzên îşxalker re karîn vekişin. Çavkaniyan piştrast kirin ku artêşa îşxalker li herêmê ji bo mucahîdan lêgerînek berfireh daye destpêkirin.

Artêşa îşxalker daxuyaniyek da û diyar kir ku hêza hewayî ya îşxalker bi bombebarana dijwar a li herêmê beşdarî têkbirina hewldana desteserkirinê bûye. (ÎLKHA)