Tûgayên Qessam ragihandin ku cenazeyê leşkerekî îşxalker hatiye dîtin û amadekariyên pêwîst ji bo teslîmkirina wî têne kirin.

Tûgayên Îzzedîn Qessam, baskê leşkerî yê HAMASê, ragihand ku wan di dema lêgerîn û kolandinê de li rojhilatê taxa Şucayiyeyê cenazeyê yek ji leşkerên îşxalker dîtine û amadekarî têne kirin ku cenaze teslîmî hêzên îşxalker bikin.

Qessam weha got, "Ketina alavên endezyariyê û hevkariya ekîbên Tûgayên Qessam ên Xaça Sor di lêgerîna cenazeyan de di Xeta Zer de, rakirina cenazeyan pir bilez kir û garantî kir ku hejmareke mezin ji cenazeyan werin dîtin."

Tûgay piştre di daxuyaniyekê de diyar kirin ku ew plan dikin ku îro êvarê derdora saet 20:00 cenaze teslîm bikin.

Ev pêşketin du roj piştî teslîmkirina cenazeyên sê efser û leşkerên siyonîst ji teref Tûgayan ve pêk hat.

Artêşa îşxalker herêma bi navê "xeta zer" kontrol dike, ku ji bakurê Şerîda Xezzeyê heta derdora bajarê Refahê li başûr dirêj dibe û nîvê herêmê digire nav xwe.

Ji dema ku peymana agirbestê di Cotmeha borî de ket meriyetê, Hamasê 20 êsîrên sîyonîst sax û cenazeyên yên din vegerandiye. Tevger îddîa dike ku derxistina cenazeyên mayî "ji ber wêraniya mezin a ku ji ber şer hiştiye dê wext bigire."

Li gorî ofîsa medyayê ya hikûmetê li Xezzeyê, ji 7ê Cotmeha 2023an vir ve di encama qirkirina siyonîstan de zêdetirî 68.000 kes şehîd bûne û zêdetirî 170.000 kes jî birîndar bûne. Di êrîşan de zêdetirî 90% ji binesaziya sivîl a li herêmê wêran bûye û nêzîkî 9.500 Filistînî hîn jî winda ne. (ÎLKHA)