Bertekên navneteweyî di demekê de li dijî êrîşên qirkirinê yên rejîma sîyonîst ên li Xezzeyê zêde dibin, hikûmeta Şîlîyê bi vekişandina du ataşeyên xwe yên leşkerî ji balyozxaneya xwe ya li Tel Avîvê gaveke berbiçav avêt.

Wezareta Karên Derve ya Şîliyê di daxuyaniyekê de ku li ser malpera xwe ya fermî hate weşandin, ev gava navborî ji raya giştî re ragihand.

Di daxuyaniyê de "êrîşên leşkerî yên bêhevseng û bêserûber û astengiyên li pêşiya ketina alîkariya mirovî bo herêmê" li Xezzeyê wekî sedema biryara vekişînê hatin destnîşankirin. Rêveberiya Şîliyê bangek eşkere li rejîma sîyonîst kir û tekez kir ku divê ew "dagirkeriyê rawestîne, li gorî qanûnên navneteweyî tevbigere û rê bide derbasbûna alîkariyan".

Wezareta Karên Derve ya Filistînê jî biryar wekî "helwesteke wêrek û bi rûmet" bi nav kir. Di daxuyaniyê de hat gotin, "Ev nîşaneyek girîng a berteka zêde ya civaka navneteweyî ye. Divê em êdî li hember polîtîkayên qirkirin, dagirkerî û cezakirina kolektîf ên ku ji hêla rejîma siyonîst ve li Xezzeyê têne meşandin bêdeng nemînin."

Li gorî rojnameya Yedioth Ahronoth, Şîlî sê ataşeyên leşkerî ji hêzên bejahî, hewayî û deryayî hebûn. Yek ji wan çend meh berê hatibû vekişandin, û niha du efserên mayî bi tevahî hatine vekişandin. Ev pêşketin beriya axaftina salane ya rewşa neteweyî ya Serokê Şîlî Gabriel Boric tê, ku tê texmînkirin roja Yekşemê pêk were. Çavkaniyên dîplomatîk ên sîyonîst ku bi rojnameyê re axivîn îddîa kirin ku Boric dikare di axaftina xwe de qutkirina tevahî ya têkiliyên dîplomatîk bi rejîmê re ragihîne.

Serokkomarê Şîlî Boric berê ji ber êrîşên li Şerîaya Rojava di sala 2022an de red kiribû ku bawernameyên balyozê sîyonîst qebûl bike. Ev helwest wekî mînakek ku helwesta wî ya biryardar a li ser meseleya Filistînê nîşan dide, hat bîranîn.

Ji aliyê din ve, nêzîkî 500 hezar kesên bi eslê xwe Filistînî li Şîliyê dijîn. Ev yek piştrast dike ku piştgiriya siyasî û civakî ji bo doza Filistînî xurt e.

Ev gava Şîliyê li gorî gavên bi heman rengî yên li herêmê ye. Kolombiyayê hefteya borî ragihand ku têkiliyên xwe yên dîplomatîk bi rejîma sîyonîst re bi temamî qut kiriye. Di sala 2023an de, Bolîvyayê bi heman awayî balyozê xwe vekişand û têkiliyên xwe yên bi welatên din re sekinand. Serokkomarê Brezîlyayê Lula da Silva jî bi eşkereyî êrîşên li ser Xezzeyê wekî "qirkirin" bi nav kir. (ÎLKHA)