Tevgera Ensarullahê Yemenê di 4ê Gulanê de li dijî Balafirgeha Ben Guriona rejima sîyonîst bi fuzeyên balîstîkî operayonek li darxist, piştî ev operasyonê gelek şîrketên balafiran seferên xwe yên Tel Avîvê rawestandin. Piştî operasyonê bi hezaran sîyonîst li derveyê welat man.

Piştî operasyona Tevgera Ensarullahê Yemenê, şîrketên balafiran li pey hev daxuyandin ku ew seferên xwe yên Tel Avîvê rawestandine.

Şîrkerên Eurowings, Swiss, Austrian Airlines û Brussels Airlinesê ku aîdê Koma Lufthansa navenda wî Elmanyaye ne daxuyandin ku ew heta 11ê Gulanê seferên xwe betal kirine. Di heman demê de şîrketa ITA Airways a Îtalyayê jî heta vê dîrokê seferên xwe yên Tel Avîvê daye sekinandin. Şîrketa United Airlinesê ku navenda wî Emrîka ye diyar kir ku qedexeya seferên xwe heta 9ê Gulanê, şîrketa Wizz Air (Macaristan)  jî heta 8ê Gulanê dirêj kirîye.

Şîrketên mezin ên dinê jî wek Delta Air Lines (Emrîka), British Airways (Îngilistan), Ryanair (İrlanda) û Aegean Airlines (Yewnanistan) seferên xwe yên Tel Avîvê herî kêm heta 6ê Gulanê dane sekinandin. British Airways, daxuyand ku ew di dema operasyona Ensarullahê de mirettebatên xwe yên li Tel Avîvê bi acîlî tehlîyeya Vîyanayê kirine.

Li gorî çapemenîya Îngîlîz û sîyonîstan balafira Air India ya ku sefera Delhîya Nû-Tel Avîvê dikir çend deqîqe mabû ku xwe daxîne Tel Avîvê berê xwe guhart û çû Abu Dabîyê. Li gorî çavkanîyên wek The Times of Israel û Yedioth Ahronotê van daxuyanîyan, bi hezaran welatîyên rejima sîyonîst li derveyê welat hişt.

Tevgera Ensarullahê, piştî operasyona Ben Gurionê daxuyandibû ku ew li hember rejima sîyonîst dorpêçekî mezin dane destpêkirin û ji şîrketên balafiran re gotibû ku bila seferên xwe yên ji rejîma îşxalker re betal bikin. (ÎLKHA)