Her çiqas Washingtonê ragihand ku êrîşên xwe yên asîmanî li Yemenê rawestandiye jî, Hêzên Behrê yên Emrîkayê hişyarî da ku "Divê Ensarullah neyê kêm dîtin." Wezîrê Parastinê Pete Hegseth got, "Me wan bi tevahî tune nekirîye, çîmkî pêşîneyên me yên din hene."

Wezîrê Parastinê yê Emrîkayê Pete Hegseth di hevpeyvînekê de ligel Fox Newsê parastina agirbesta welatê xwe ya bi Ensarullah re kir. Hegseth diyar kir ku ew ê şaşiyên ku li Iraq û Efxenistanê hatine kirin dubare nekin û îddîa kir ku rawestandina êrîşên li dijî Ensarullahê jî ji bo "parastina trafîka behrê" bû.

Hegseth got, "Eger em hemû dema xwe ji bo guhertina rejîma Yemenê xerc bikin, em ê berjewendiyên xwe yên sereke, wek Îran û Çînê, paşguh bikin. Me Ensarullah bi tevahî tune nekirîye ji ber ku pirsgirêkên mezintir li pêşiya me ne."

Ji aliyekî din ve, Wekîlê Serokê Operasyonên Hêzên Deryayî yên Emrîkayê James Kilby di civîna Konseya Têkiliyên Derve ya li Washingtonê de got ku kêm nirxandina Ensarullah xelet e.

Kilby got, "Ew ne Çîn in, lê ew tehdîdek cîddî çêdikin. Ew êrîşî keştîyên me dikin. Ew taktîkan diguherînin. Ew ê xelet be ku meriv wan kêm binirxîne."

Ev daxuyanî piştî wê yekê hatin ku Emrîkayê du hefte berê ragihand ku wan êrîşên esmanî yên li dijî Ensarullahê li Yemenê rawestandine. Ev biryar di heman demê de bi peymana Ensarullah re ji bo rawestandina êrîşên li ser keştîyên Emrîkayê li Behra Sor hate ragihandin.

Serokê Emrîkayê Donald Trump jî vê dawîyê bi Serokwezîrê Kanadayê re civîneke çapemeniyê ya hevbeş li dar xist û bi fermî peymana ku bi Ensarullah re ji bo rawestandina êrîşên hevbeş hatiye kirin, ragihandibû. Ji aliyê din ve, Wezareta Derve ya Emrîkayê vê peymanê wekî serkeftinê pêşkêşî raya giştî kir û îddîa kir ku Ensarullah "êdî niyeta wî ya şerkirinê nemaye". (ÎLKHA)