Erdheja bi pileya 5.4 ku li navçeya Karakopru ya Rihayê qewimî, li bajarên derdorê jî hate hîskirin. Piştî erdhejê, ekîban li seranserê bajêr lêkolînên meydanî dan destpêkirin û hate hînbûn ku hinek xanî li taxên gundan zirar dîtine.

Li gorî daneyên AFADê, erdhejeke bi lerza 5.4 pileyî ku navenda wê li Karakopruyê bû, saet di 10:40an de bi kûrahiya 7.39 kîlometreyan çêbû.

Erdhej li Rihayê, li Semsûr, Entap, Dîyarbekir, Mereş, Xarpêt, Mêrdîn û Meletîyê jî hat hîskirin. Her wiha hinek çavkaniyan ragihandin ku erdhej li Êlih, Sêrt, Bedlîs û Şirnexê jî hatiye hîskirin.

Piştî erdhejê, ekîbên ku ji hêla Walîtiya Rihayê ve têne hevrêzkirin li navenda bajêr û taxên gundan dest bi lêkolînên meydanî kirin. Waliyê Rihayê Hasan Şildak diyar kir ku di lêkolînên destpêkê de ti qurbanî an jî ziyanên mezin nehatine dîtin.

Lêkolînên meydanî eşkere kirin ku hinek taxên gundan ji erdhejê tesîrdar bûne û hinek xanî jî zirar dîtine. Nirxandinên destpêkê nîşan didin ku li seranserê bajêr ti wêraniyeke girîng çênebûye.

Piştî erdhejê, welatiyên bi fikar mal û cihên kar ên xwe terikandin û li parq, baxçe û deverên din ên vekirî kom bûn. Hinek welatî demekê li deverên vekirî li bendê man û ji ber îhtîmala erdhejên paşve venegeriyan malên xwe.

Li gorî agahiyan, tîm li navenda bajêr û taxên gundan xebatên nirxandina zirar û lêkolînên meydanî didomînin. (ÎLKHA)