رژێمی داگیرکەری سەهیۆنی بە شێوەیەکی ئاشکرا ئاگربەستی پێشێل کرد و لە ئەنجامی بۆردومانی ئاسمانی و تۆپهاوێژی لانیکەم ٨ کەس شەهید بوون و زیاتر لە ٢٥ کەسیش بریندار بوون.

مەحمود بەسەڵ وتەبێژی بەرگری شارستانی غەززە راگەیاند، "دوای دەستپێکردنی ئاگربەست لە کاتژمێر ٠٩:٣٠ چەندین هێرش ئەنجام دراون و لە شاری غەززە ٥ و لە باکووری غەززە ٣ کەس شەهید بوون و ژمارەی بریندارەکان گەشتە ٢٥ کەس."

پێشتر میدیاکانی خۆجێ باسیان لەوە کردبوو سوپای داگیرکەر هێرشی کردووە سەر هاوڵاتیان لە گەڕەکەکانی زەیتوون و شەعفی شاری غەززە و دوای هێرشەکە تەرمی ٣ کەس و ژمارەیەکی زۆر بریندار رەوانەی نەخۆشخانە کراوە.

سوپای داگیرکەر هێرشێکی دیکە بۆ سەر شاری بەیت حانون لە باکووری غەززە ئەنجام دایەوە و لە ئەنجامی هێرشەکەدا چەند کەس شەهید و بریندار بوون.

فڕۆکەکانی داگیرکەر هێرشیان کردە سەر باکووری کەناری غەززە و بەهۆیەوە لە شاری سدەرۆت زەنگەکانی هۆشداری لێدرا. رژێمی داگیرکەر دانیبەوەنا کە زەنگەکان بە هەڵەیی لێدراون.

سوپای داگیرکەر ئەمڕۆ بەیانی راگەیاند کە هێرشیان کردووە سەر ژمارەیەکی زۆر ئامانج لە کەناری غەززە.(İLKHA)