بەڕێوەبەرایەتی بەرگری شارستانی لە غەززە رایگەیاند، دوای رێککەوتنی ئاگربەست، چالاکییەکان بۆ دۆزینەوەی تەرمی شەهیدەکان لە ژێر داروپەردوو ڕوخاوەکاندا بەردەوامە.

لە بەیاننامەیەکی نووسراودا کە لەلایەن بەڕێوەبەرایەتی بەرگری شارستانییەوە بڵاو کراوە ئاماژە بەوە کراوە کە تەرمی کۆی گشتی ٦٦ شەهید دۆزرایەوە کە ٨ کەسیان لە باکووری غەززە و ٥٨ کەسیان لە باشوور بوون.

لە راگەیەندراوەکەدا هاتووە، هەوڵەکانی گەڕان لە ناوچەکە بەردەوامە و پێویستیان بە کەرەستەی زیاتر و ئامێری بیناسازی هەیە بۆ دەرێنانی ئەو شەهیدانەی لە ژێر داروپەردوودا گیریان خواردووە.

لە ١٩ی کانوونی دووەم رێککەوتنی ئاگربەست لە نێوان بزووتنەوەی خۆڕاگری ئیسلامیی فەلەستین (حەماس) و رژێمی داگیرکەری سەهیۆنی راگەیەندرا.

لە لایەکی دیکەوە، بەناو سوپای ڕژێمی سەهیۆنی رایگەیاند کە بە پێی ڕێککەوتنی ئاگربەست و ئاڵوگۆڕی دیل، دانیشتووانی کەناری غەززە لە هەفتەی داهاتوودا بە ڕێڕەوی نەتزەریمەوە دەتوانن بگەڕێنەوە باکوور.

ئەڤیخای ئەدرەعی وتەبێژی سوپای داگیرکەری سەهیۆنی وتی، "لە هەفتەی داهاتووەوە دانیشتوانی کەناری غەززە دەتوانن بگەڕێنەوە باکور و ڕێنماییەکان بۆ ئەم مەبەستە دەردەچن."(İLKHA)