سعوودیە ئیدیعای دۆنالد ترامپ سەرۆکی ئەمریکای ڕەتکردەوە کە سەعوودیە وازی لە مەرجی دامەزراندنی دەوڵەتی فەلەستینی هێناوە بۆ ئاساییبوونەوە لەگەڵ رژێمی سەهیۆنی.

وەزارەتی دەرەوەی سعوودی لە بەیاننامەیەکدا رایگەیاند، پەیوەندییەکانی لەگەڵ رژێمی داگیرکەردا دروست ناکەن تا دەوڵەتی فەلەستین دروست نەبێت و هەڵوێستی سعوودیە لەبارەی ئەم پرسە ناگۆڕێت.

لە بەیاننامەکەدا هاتووە، شازادە محەمەد بن سەلمان جەختی لەوە کردووەتەوە کە سعودیە "کارە بەئەمەکەکانی بۆ دامەزراندنی دەوڵەتێکی سەربەخۆی فەلەستینی کە قودسی ڕۆژهەڵات پایتەختی خۆی بێت ڕاناگرێت و بەبێ ئەمە پەیوەندی دیپلۆماسی لەگەڵ ئیسرائیل دروست ناکات."

لە بەیاننامەکەدا جەخت لەوە کراوەتەوە کە سعودیە "بە توندی هەر سازشێک لەسەر مافە ڕەواکانی گەلی فەلەستین لە ڕێگەی سیاسەتەکانی نیشتەجێبوونی ئیسرائیل، لکاندنی زەوییە فەلەستینییەکان یان هەوڵدان بۆ دەرکردنی گەلی فەلەستین لە خاکەکانیان ڕەتدەکاتەوە. ئەرکی کۆمەڵگەی نێودەوڵەتی ئەمڕۆ کارکردنە بۆ کەمکردنەوەی ئازارە مرۆییە سەختەکانی گەلی فەلەستین، کە بەردەوام دەبن لە پاراستنی خاکەکانیان و وازیان لێناهێنێت."

لە بەیاننامەکەدا هاتووە، "هەڵوێستی یەکلاکەرەوەی پاشایەتی لە ژێر دانوستان و پێشنیارێکدا نییە و ئاشتییەکی بەردەوام و دادپەروەرانە بەدی نایەت تا گەلی فەلەستین بە پێی بڕیارە شەرعییە نێودەوڵەتییەکان مافە ڕەواکانی خۆیان بەدەست نەهێنن و ئەمەش پێشتر بۆ ئیدارەی پێشووی ئەمریکا و ئیدارەی ئێستا ڕوون کراوەتەوە."(İLKHA)