عیزەت ئەلرشق ئەندامی ئۆفیسی سیاسی حەماس لەبارەی راگەیەندراوەکەی ترامپ بۆ کڕینی غەززە وتی، "راگەیەندراوی ترامپ لەبارەی کڕینی غەززە بێ مانایە و گوزارشت لە نەزانییەکی قووڵی لەبارەی فەلەستین دەکات."

عیزەت ئەلرشق ئەندامی ئۆفیسی سیاسی بزووتنەوەی خۆڕاگری ئیسلامی حەماس لە راگەیەندراوێکی میدیایی وتی، "غەززە مولکێک نییە کە بکڕێت و بفڕۆشرێت. غەززە بەشێکە لە خاکەکانی داگیرکراوی فەلەستین کە لێی جیا نابێتەوە."

ناوبراو جەختی لەوە کرد، گەلی فەلەستین تەواوی پلانەکانی ترامپ بۆ راگواستنی غەززەییەکان پوچەڵ دەکات.

ئەلرشق وتی، "غەززە هی گەلەکەیانە وە ئەوان تا کاتێک نەگەڕێنەوە شار و گوندەکانیان کە لە ساڵی ١٩٤٨ داگیر کراوە غەززە بەجێ ناهێڵن.

دۆنالد ترامپ سەرۆکی ئەمریکا لە راگەیەندراوێک بۆ ڕۆژنامەنووسەکان راگەیەندراوە فەزیحەکەی دووبارە کردەوە.

ترامپ باسی لەوە کرد کە ئەمریکا دەبێتە خاوەنی غەززە و لەگەڵ وڵاتانی دیکەی دەوڵەمەندی ڕۆژهەڵاتی ناوەڕاست غەززەی ئاوادان دەکەن و وتی، "پێداگرم لە کڕین و خاوەنبوون بە غەززە."

ترامپ وتی، "وەک سایتێکی گەورەی خانووبەرە بیری لێبکەنەوە، ئەمریکا خاوەنی دەبێت و بە هێواشی، زۆر بە هێواشی."

ترامپ باسی لەوە کرد کە لەگەڵ وڵاتە دەوڵەمەندەکانی دیکەی ڕۆژهەڵاتی ناوەڕاست غەززە دووبارە ئاوادان دەکەن و وتی، "وەردەگیرێتەوە. ڕاست دەکرێتەوە و چاک دەکرێتەوە. لەوێ کەس نامێنێت. حەماس نامێنێت. ئێمە لە ڕێگەی وڵاتانی زۆر دەوڵەمەندی دیکەی ڕۆژهەڵاتی ناوەڕاستەوە بنیات دەنێین. شوێنی باش بۆ مرۆڤەکان، بۆ فەلەستینییەکان، بۆ ژیان دروست دەکەن. پێدەچێت دوای سەدان ساڵ بۆ یەکەمجار بە هاوئاهەنگی و ئاشتی بژین. من بڕیارم داوە غەززە بکڕم و خاوەندارێتی بکەم. هیچ شتێک نەماوە بۆ گەڕانەوە بۆ غەززە. زۆر ناپارێزراوە بەڵام لە داهاتوودا دەیکەین بە شوێنێکی زۆر باش بۆ ئەوەی لەلایەن کەسێکەوە پەرەی پێبدرێت. ئێمە ڕێگە بە وڵاتانی دیکە دەدەین کە بەشێکی پەرەپێبدەن. خۆش دەبێت. خەڵک لە هەموو جیهانەوە دەتوانن بێنە و لەوێ بژین."

ترامپ لە بەردەوامی وتی، "واتە، دەبینین. هیوادارین میسڕ و ئوردن و وڵاتانی دیکە هاوکاری بکەن. هیوادارین وڵاتی وەک سعوودیە و ئەوانەی دیکە پارە بۆ ئەمە خەرج بکەن. پارەیەکی زۆر زۆریان هەیە. بۆ ئاسوودەیی ژیانی مرۆڤەکان کەمێک پارە خەرج دەکەن."(İLKHA)