بەندەری ڕاڤێنا لە ئیتالیا، لەسەر داوای دەسەڵاتدارانی ناوخۆیی و بەپێی بەیاننامەیەکی دەرچوو لەلایەن شارەوانیی شارەکەوە، ڕەتی کردەوە دوو بار تەقەمەنی بۆ ناردن بۆ خاکە داگیرکراوەکان بار بکات.

بەپێی ڕاپۆرتی ناوەندی ڕاگەیاندنی فەلەستین، لەم چوارچێوەیەدا، ئەلێساندرۆ پاراتۆنی، سەرۆکی شارەوانیی ئەم شارە کە دەکەوێتە باکووری ئیتالیاوە، لە بەیاننامەیەکدا ڕایگەیاند، "بەهۆی ئازایەتیی هەندێک لە کارمەندانی بەندەرەکەوە، ڕاپۆرتگەلێکمان پێگەیشت سەبارەت بە بارکردنی دوو بار تەقەمەنی لە بەندەری ڕاڤێنا."

ناوبراو وتیشی، "دوای ئەنجامدانی لێکۆڵینەوە سەبارەت بەم هەواڵانە و ئەنجامدانی چەند ڕاوێژێک لەگەڵ بەرپرسانی پەیوەندیدار، نامەیەک ئاراستەی بەرپرسانی ئەو کۆمپانیایە کرا کە بەڕێوەبەرایەتیی بەندەری ڕاڤێنا دەکات، و داوایان لێکرا هەموو ڕێوشوێنێکی یاساییی پێویست بگرنەبەر بۆ ڕێگریکردن لە بارکردنی ئەم بارانە بۆ خاکێک کە شاهیدی پێکدادانی چەکداری و پێشێلکاریی یاسا نێودەوڵەتییەکانە، کە ئەمەش لەلایەن ڕێکخراوە نێودەوڵەتییەکانیشەوە جەختی لێکراوەتەوە."

ئەم بەرپرسە لە درێژەی قسەکانیدا وتی، "هەمیشە لایەنێک هەیە کە دەبێت هەڵیبژێریت، ئەویش وەستانە لە پاڵ قوربانییە بێتاوانەکاندا، نەک حکومەتە تاوانبارەکان و ڕێکخراوە تیرۆریستییەکان. هەر بڕیارێکی دیکە و تەنانەت بێلایەنیش، بڕیارێکی سیاسییە."

دوای ناردنی ئەم پەیامە، کۆمپانیای بەڕێوەبەری بەندەری ڕاڤێنا ڕایگەیاند کە بارکردنی ئەم دوو بارە بۆ خاکە داگیرکراوەکان نایاساییە.

جێگای ئاماژەیە کە کارمەندانی بەندەرەکان لە هەندێک وڵاتی ئەوروپی وەک فەرەنسا، سوید و یۆنان، هەنگاوی هاوشێوەیان گرتووەتەبەر بۆ ڕێگریکردن لە ناردنی بارە چەکەکان بۆ خاکە داگیرکراوەکان.(İLKHA)