نزیکەی ٥٠٠ هەزار هاووڵاتیی مەدەنی لە شاری غەززە لەژێر بۆردوومان و وێرانکاریی سیستەماتیکدا، بەدەست کەمیی سەختی خۆراک، ئاوی خواردنەوەی پاک و خزمەتگوزارییە سەرەتاییەکانی تەندروستی و پزیشکییەوە دەژین.

بەپێی ڕاپۆرتی ناوەندی ڕاگەیاندنی فەلەستین، بەپێی خەمڵاندنە ناوخۆیی و نێودەوڵەتییەکان، نزیکەی ٥٠٠ هەزار هاووڵاتیی مەدەنی کە زۆربەیان منداڵان، ژنان و بەساڵاچووانن لە شاری غەززە لەژێر بۆردوومان و وێرانکاریی سیستەماتیکدا، بەدەست کەمیی سەختی خۆراک، ئاوی خواردنەوەی پاک و خزمەتگوزارییە سەرەتاییەکانی تەندروستی و پزیشکییەوە دەژین.

ئەم دۆخە نەک هەر هەڕەشە لە ژیانیان دەکات، بەڵکو دەرئەنجامی دەروونیی وێرانکەریشی هەیە، بەتایبەتی لەسەر منداڵان؛ منداڵانێک کە لە کەشێکی ترس و شۆکدا گەورە دەبن، و ژنانێک کە لە نەبوونی ئاسایش و پشتیوانیدا، بارێکی دوو قاتیان لەسەرشانە.

شارەوانیی غەززە، ڕوو لە ویژدانە زیندووەکانی سەرانسەری جیهان و هەموو دامەزراوە مرۆیی و نێودەوڵەتییەکان، جەختی کردەوە، "ئێستا لەگەڵ غەززە بن؛ بۆ پاراستنی هاووڵاتیانی مەدەنی و دابینکردنی پێداویستییە ژیانییەکانیان کە خۆراک، ئاو، دەرمان و خزمەتگوزاریی پزیشکی لە خۆ دەگرێت، هەنگاوی بەپەلە بنێن."

لە کۆتایی بەیاننامەکەدا هاتووە، "هاواری غەززە ئەمڕۆ تەنیا ژمارەی وشک و بێ گیان نییە؛ بەڵکوو گیانی بێتاوانە کە بەدوای ئاسایش، پارووە نانێک، قومە ئاوێک و کەمێک دەرماندا دەگەڕێن. پشتیوانیان بن و بەجێیان مەهێڵن."(İLKHA)