نووسینگەی ڕاگەیاندنی دیلەکانی فەلەستین ئەمڕۆ هەینی بە بڵاوکردنەوەی ڕاپۆرتێکی هەژێنەر، سەبارەت بە بارودۆخی سەخت و سەرما کوشندەکەی ناو زیندانەکانی رژێمی سەهیۆنی، بەتایبەتی دوای ٧ی تشرینی یەکەم، هۆشداریی دا.

لە ڕاگەیەندراوەکەی نووسینگەی ڕاگەیاندنی دیلەکانی فەلەستین بارودۆخی ئێستا بە دۆخێکی زۆر نائاسایی وەسف کراوە و داوا لە کۆمەڵگەی نێودەوڵەتی کراوە دەستبەجێ بۆ باشترکردنی ڕەوشەکە دەستێوەردان بکات.

بەپێی ئەم ڕاپۆرتە، لە ٧ی تشرینی یەکەمی ڕابردووەوە بەڕێوەبەرایەتیی زیندانەکانی رژێمی سەهیۆنی دۆخێکی نائاسایی بێوێنەی لە زیندانەکاندا سەپاندووە.

ئەم دۆخە کەرەنتینەی تەواو، دابڕانی ڕەهای بەندکراوان لە جیهانی دەرەوە و قەدەغەکردنی تەواوەتیی سەردان و هەر جۆرە یارمەتییەک بۆیان لەخۆدەگرێت.

ئەم ڕاپۆرتە هەروەها ئاشکرای دەکات کە رژێمی داگیرکەر ڕێگری دەکات لە گەیشتنی جلوبەرگ و بەتانیی زستانە بە زیندانەکان. لە ئەنجامدا، دیلەکان ناچارن بە جلوبەرگی دڕاو و کۆنەوە، کە تەمەنی هەندێکیان دەگاتە دوو ساڵ، ڕووبەڕووی سەرما توند و سوتێنەرەکەی زستان ببنەوە.

سەرەڕای ئەوەش، ئاوی گەرم ماوەی دوو ساڵە بڕاوە و بەندکراوان ناچارن بە ئاوی سارد خۆیان بشۆن. لە کاتی ئۆپەراسیۆنەکانی سەرکوتکردندا، دیلەکان بۆ ماوەی چەندین کاتژمێر لە شوێنی کراوە و لەبەر سەرما بەجێ دەهێڵرێن.

نووسینگەی ڕاگەیاندنی دیلەکانی فەلەستین هەروەها نیگەرانیی خۆی لە قەرەباڵغیی زیندانەکان دەربڕی و ڕایگەیاند کە لە هەندێک ژووردا، ١٦ دیل لە ژوورێکدا ڕاگیراون کە تەنها جێگەی ٨ کەسی تێدا دەبێتەوە.

ئەم دۆخە وای کردووە نیوەی بەندکراوان ناچار بن لەسەر زەوی و بەبێ بەتانی بخەون، کە ئەنجامەکەی بڵاوبوونەوەی بەربڵاوی نەخۆشییەکانی پێستە، بەتایبەتی گەڕی، لەنێویاندا.

لە ڕاگەیەندراوەکە باس لەوە کرا کە ئەسیر مونتەسیر بیلال عەجاج خەڵکی شاری توولکەرەم بەهۆی سەرما و بارودۆخی نالەبارەوە، لە جووڵەدا تووشی کێشە بووە و سەرما چووەتە هەموو گیانییەوە. ئەسیر محەممەد عەرمان لە کاتی سەرکوتکردنیدا لە لایەن سەربازانی داگیرکەرەوە، ئاوی ساردی بەسەردا کراوە. ئەسیر موعەممەر شەحروور هەموو جلوبەرگە زیادەکانی دەستی بەسەردا گیراوە. ئەسیر موهەننەد شەریم لە بەتانی و خۆراکی پێویست بێبەش کراوە.

نووسینگەی ناوبراو لە کۆتایی ڕاپۆرتەکەیدا سەبارەت بە سەرما کوشندەکەی ناو زیندانەکان هۆشداریی دا و داوای لە هەموو دامەزراوە نێودەوڵەتییە بەرپرسەکان کرد کە دەستبەجێ بەرنامەی سەردانیکردنی دیلەکان دەست پێبکەنەوە و ڕێگە بدەن جلوبەرگ و بەتانیی زستانە ببرێتە ناو زیندانەکانەوە.(İLKHA)