ئەفغانستان و ڕووسیا یاداشتێکی لێکتێگەیشتنیان سەبارەت بە هاوکاری ئابووری بە بەهای 103 ملیۆن دۆلاری ئەمریکی واژۆ کرد.

بە گوتەی حەمدوڵڵا فیترەت، جێگری وتەبێژی حکومەتی ئەفغانستان، ئیدارەی ئەفغانستان و ڕووسیا یاداشتنامەی هاوکاری ئابوورییان بە بەهای 103 ملیۆن دۆلاری ئەمریکی واژۆ کردووە، کە ئامانج لێی پتەوکردنی پەیوەندییە بازرگانی و ئابوورییە دوو قۆڵییەکانە.

لە بەیاننامەیەکدا لە پلاتفۆرمی سۆشیال میدیای ئێکس، ئەو بەرپرسە ئاماژەی بەوە کردووە کە یاداشتنامەکە بە ئامادەبوونی جێگری سەرۆکوەزیرانی ڕووسیا ئەلێکسی ئۆڤەرچوک و مەلا عەبدولغەنی برادەر، جێگری سەرۆکوەزیرانی ئەفغانستان بۆ کاروباری ئابووری واژۆ کراوە.

سەید کەریم هاشمی، سەرۆکی ژووری بازرگانی و وەبەرهێنانی ئەفغانستان ڕایگەیاند، "ژووری بازرگانی و وەبەرهێنانی ئەفغانستان ئامادەیە ڕۆڵێکی کارا و بنیاتنەر بگێڕێت لە بەهێزکردنی پەیوەندییەکانی نێوان کۆمەڵگە بازرگانییەکانی هەردوو وڵات، ئاسانکاری بۆ هاوکاری و گفتوگۆ، و گەڕان بەدوای دەرفەتە بازرگانییەکان".

هاوکات نوێنەرانی ڕووسیا ئامادەیی مۆسکۆیان دەربڕی بۆ فراوانکردنی بازرگانی و بەهێزکردنی هاوکارییە کشتوکاڵییەکان و وەبەرهێنان لە پڕۆژەکانی بەرهەمهێنان لە ناوخۆی ئەفغانستان.

دیمیتری ئەنتۆنۆڤ، سەرۆکی ئەنجومەنی هاوکاری لەگەڵ ئەفغانستان لە ژووری بازرگانی و پیشەسازی ڕووسیا، تێبینی کرد، "ئێمە دەستمان بە گفتوگۆ لەگەڵ سەرکردە بازرگانییەکانی ئەفغانستان کردووە. پێموایە ئەمە یەکێکە لە سەردانە هەرە گرنگەکانی نوێنەرانی بازرگانی ڕووسیا بۆ ئەفغانستان تا ئێستا. شاندێکی گەورەمان لەگەڵدایە کە پێکهاتووە لە بەرپرسانی حکومەت و سەرۆکی وەزارەتەکان و نوێنەرانی دامەزراوە جیاوازەکانی ڕووسیا".

شاندێک بە سەرۆکایەتی ئەلێکسی ئۆڤەرچوک، جێگری سەرۆک وەزیرانی ڕووسیا، ڕۆژی پێنجشەممە گەیشتە کابولی پایتەختی ئەفغانستان. (İLKHA)